Pas takimit me Lajçak, Albin Kurti: Dialogu nuk është as prioriteti i parë dhe as i dytë

Kryetari i Lëvizjes Vetëvendosje, Albin Kurti, edhe pas takimit që zhvilloi në Prishtinë me të Dërguarin Special të BE-së për dialogun Kosovë-Serbi, Miroslav Lajçak u shpreh qartë se dialogu nuk është as prioriteti i parë dhe as i dytë, por por më e rëndësishme është që ky dialog të jetë i përgatitur mirë.

“Më informoi me procesin e dialogut në përgjithësi. Unë shpjegova edhe një herë që ne i kemi fituar këto zgjedhje me programin tonë që përqendrohet te drejtësia dhe punësimi, se jemi në kushtet e pandemisë COVID-19, dhe se nuk jemi kundër dialogut, por e duam parimor dhe të përgatitur mirë,” tha Albin Kurti duke shtuar se dialogu duhet të jetë i sinqertë:

“Nuk mund të jetë prioriteti i parë ose i dytë, sepse janë drejtësia dhe punësimi. Nuk e mohoj rëndësinë e dialogut – edhe për BE-në, Kosovën dhe Serbinë dhe rajonin, por më e rëndësishmja është që ky dialog të jetë i përgatitur mirë. Të jetë dialog i sinqertë në të cilin nuk jemi në presionin e kohës, por jemi me përkushtimin për substancë”, tha ai

Ndërkohë i Dërguari Special i Bashkimit Evropian për dialogun Kosovë-Serbi, Mirosllav Lajçak, pas takimit me kryetarin e Lëvizjes Vetëvendosje, Albin Kurti përmes rrjetit sociall Twitter shprehet:

“Sonte patëm një takim të mirë dhe konstruktiv me Albin Kurtin. Ne diskutuam thellësisht për dialogun, gjithashtu me synimin për hapat e ardhshëm.”

Në orët e mbrëmjes I Dërguari Special i BE-së për dialogun Kosovë-Serbi, Miroslav Lajcak, zhvilloi takim dhe me Ambasadorin e SHBA-së në Kosovë, Philip Kosnett.

Pas takimit, Ambasadori Kosnett tha se BE e ka mbështetjen e plotë të SHBA në ndërmjetësimin e dialogut Kosovë-Serbi:

“Në takimin e sotëm me Miroslav Lajcak, riafirmova mbështetjen e SHBA-së për një bashkëpunimi, për dialogun, të udhëhequr nga BE-ja. Qëllimi ynë: një zgjidhje gjithëpërfshirëse dhe integrim më i thellë Euro-Atlantik nga e cila përfitojnë të gjithë qytetarët e Kosovës dhe Serbisë.”

Nesër, ditën e dytë të vizitës tre ditore në Kosovë, Mirosllav Lajçak e nis me takimin me Ushtruesen e Detyrës së Presidentes, Vjosa Osmani. Takimi pritet të mbahet në kabinetin e Presidentes në orën 08:00 dhe pas takimit, do të mbahet një konferencë për media.