Pas takimit me Lajçak, Krasniqi: Shpreha rezervat e PDK-së për marrëveshjen!
Pas takimit me të dërguarin e BE-së për dialogun, Miroslav Lajçak, Kryetari i Partisë Demokratike të Kosovës, Memli Krasniqi, tha se kishte shprehur rezervat që ka PDK për marrëveshjen e cila nuk ka njohje reciproke në qendër, por asociacion.
“Në diskutimet për marrëveshjen e propozuar Lajçakut ia shpreha edhe njëherë qëndrimin e PDK-së, rezervat që i kemi sa i përket marrëveshjes për arsye të cilat i kemi diskutuar edhe në të kaluarën. Ne kemi qenë mbështetës të procesit të dialogut duke pritur një përfundim që sjell marrëveshje finale njohje të ndërsjellë. Ky ka qenë jo vetëm qëndrimi ynë po edhe qasja e partnerëve ndërkombëtarë,” tha Memli Krasniqi duke ripërsëritur se ajo që është sot në tavolinë nuk është një marrëveshje e përkohshme, jo me njohjen e ndërsjellë por me Asociacionin në qendër.
Në fund, Kryetari i PDK, Memli Krasniqi vlerësoi se Kryeministri Albin Kurti ka dështuar t’i bindë mbështetësit ndërkombëtarë për ta mbështetur Kosovën në realizimin e qëllimeve të saj. Ai ka shtuar se pa njohje të ndërsjellë vetëm do të ketë vazhdim të dialogut.
Ndryshe, Përfaqësuesi i posaçëm i BE-së për dialogun Kosovë-Serbi, Miroslav Lajçak, ditën e dytë të vizitës në Prishtinë, sot e nisi në selinë e partisë opozitare, PDK.
Dje, Lajçak ka zhvilluar takime me Presidenten Vjosa Osmani dhe Kryeministrin Albin Kurti ku u shpreh optimist se në takimin e radhës në Ohër, më 18 mars, me Kurtin dhe Vuçiç do të arrihet marrëveshja për zbatimin e planit evropian.
