Pas takimit me Metën/ Fakte tronditëse, Ish-Presidenti Nishani: Tendencë për të minuar institucionin e Presidentit!

Pas takimit prej 30 minutave me Presidentin e Republikës, Ish-Presidenti Bujar Nishani tha se është tronditur nga disa fakte që lidhen me kapjen e sistemit dhe infektimin e rëndë të pavarësisë dhe profesionalizmit të Gjykatës Kushtetuese.

“U njoha me çështje të pabëra ende publike nga ana e presidentit që tregojnë për një tendencë për të minuar institucionin e presidentit dhe besueshmërinë e proceseve shtet ndërtuese në vend ndaj e mbështes plotësisht presidentin në qëndrimin e tij kushtetues në mbrojtje të integritetit të atij që është si një proces që shqiptarët po e mbajnë gjallë besimin, reformën në sistemin e drejtësisë, por mbi të gjithë respektin ndaj shtetit të së drejtës,” tha Ish-Presidenti i Republikës, Bujar  Nishani duke mos saktësuar se për çfarë faktesh bëhet fjale, meqë sipas tij I takon Ppresidentit ti bëjë publike.

Ndërkohë i pyetur për reagimet e ambasadave në Tiranë, Ish-Presidenti I Republikës tha se nuk bën komente mbi asnjë deklaratë ambasadori.

“Nuk bëj komente të asnjë ambasadori, respektoj statusin diplomatik të çdo selie diplomatike dhe ambasadori në vendin tonë, ashtu siç për mua është shumë e rëndësishme që mbi gjithçka në këtë vend secili prej nesh të respektojë kushtetutën e vendit dhe ligjet e këtij vendi.”

Sa i përket sugjerimit për një opinion nga Komisioni i Venecias, Nishani mendon se nuk ka asnjë arsyetim ligjor ndërsa përfundon:

“Çështja e Venecias është një çështje që nuk ka asnjë lloj baze në një arsyetim as politik e as ligjor. Në rastin e Reformës në Drejtësi po edhe në rastin konkret i ka dhënë në mënyrë eksplicite rekomandimet e saj. Janë tre çështje që nuk kanë nevojë për interpretim por për zbatim. Janë tre çështje që janë mjaft të qarta, janë shkruar në kushtetutë mbi bazën e rekomandimeve të Venecias.”