Pas takimit me Presidenten e Kosovës, Kurti: Do të bëjmë çmos për konstituimin e Parlamentit

Pas takimit me Presidenten e Kosovës, Vjosa Osmani, kryetari i Lëvizjes Vetëvendosje dhe Kryeministri në detyrë, Albin Kurti, tha se do të bëjnë çmos për konstituimin e Parlamentit brenda periudhës së paraparë 30 ditore nga aktgjykimin e Gjykatës Kushtetuese.

“Diskutuam gjerë e gjatë. I përmendëm të gjitha elementet përbërëse dhe tash zonja presidente do të ketë takime edhe me përfaqësues të partive të tjera politike, e mbase në fund mund të shohim nëse kemi bërë përparim, sa kemi bërë përparim dhe sa është i mjaftueshëm një përparim i tillë. Besoj se duhet t’i japim shansin edhe takimeve tjera dhe në fund të shohim se cili progresi për të cilin jemi të interesuar që të gjithë,” tha Albin Kurti duke shpresuar në frymën e bashkëpunimit, idenë e konsensusit apo kompromisit të kalohet tek formimi i qeverisë së re, që i përgjigjet Parlamentit të ri të Republikës.

Ndryshe, me rastin e ftesës së Presidentes së Kosovës, Vjosa Osmani, drejtuar krerëve të partive politike për takim, Presidentja është shprehur se pret që partitë e përfaqësuara në Parlament ta zbatojnë aktgjykimin e Gjykatës Kushtetuese dhe ta përfundojnë seancën konstituive brenda 30 ditësh, siç ka kërkuar Gjykata.