Pas takimit me Presidenten Osmani, O’Brien: Jemi krenarë që e mbështesim Kosovën

Nd/Sekretari amerikan i Shtetit, James O’Brien, pas takimit që zhvilloi me Presidenten Vjosa Osmani, tha se Shtetet Bashkuara janë krenare që e mbështesin Kosovën.

Përmes një postimi në rrjetin social X, James O’Brien tha se me Presidenten Osmani kanë folur edhe për nevojën urgjente për t’u riangazhuar në dialogun e lehtësuar nga Bashkimi Evropian.

“E mirëprita presidenten e Kosovës, Vjosa Osmani, në Washington. Ne jemi krenarë që mbështesim shtetin sovran, multietnik dhe demokratik të Kosovës. Është e rëndësishme që ne të qëndrojmë në hap për ta avancuar vizionin tonë të përbashkët,” tha Nd/Sekretari amerikan i Shtetit, James O’Brien, duke përfunduar:

“Gjithashtu folëm edhe për nevojën urgjente për t’u riangazhuar në dialogun e lehtësuar nga BE.”

Ndërkohë Presidentja e Kosovës, Vjosa Osmani, pas takimit që kishte me Nd/Sekretari amerikan të Shtetit, Jim O’Brien, tha se kanë pasur një diskutim përmbajtjesor për bashkëpunim të ngushtë me Shtetet e Bashkuara, me qëllim siç ka thënë ajo, për  tejkalimin e sfidave të përbashkëta.