Pas takimit me Presidenten, Veteranët e UÇK: Nëse dekretohet paga minimale, do bllokojmë deputetët

Pas takimit me Presidenten Vjosa Osmani, Organizatat e Veteranëve të Luftës së Ushtrisë Çlirimtare të Kosovës kanë përsëritur qëndrimin e tyre se do t’i bllokojnë deputetët që të mos hyjnë në Parlament nëse dekretohet Ligji për pagën minimale, që nuk garanton rritjen e pensionit të veteranit në lartësinë e pagës minimale.

“Në përputhje me ligjet që zbatohen, ne do t’i shfrytëzojmë rrugët ligjore. Do ta kundërshtojmë edhe me protestë, do t’i bllokojmë deputetët që të mos futen në Parlament. Këto aktivitete s’i bëjmë për një pagë, por këtu po shkelet dinjiteti i kësaj kategorie, i luftës së UÇK-së, janë shkelur institucionet dhe sikur kjo Qeveri s’do ta dijë rrugën si kemi ardhur deri këtu,” tha Xhavit Jashari nga Organizata e Veteranëve të Luftës së UÇK-së, duke i bëri thirrje Presidentes Vjosa Osmani që të mos e dekretojë Ligjin pasi, sipas tij, do t’ia vë vetes një njollë shumë të keqe sepse ky Projektligj diskriminon kategorinë më të lavdishme të luftës.