Pas takimit me Presidentin/ Haradinaj: Askush nuk mund të bisedojë me Serbinë për kufijtë e Kosovës!
Kryeministri i Kosovës Ramush Haradinaj pas takimit që ai dhe krerë të tjerë institucionalë kanë pasur me presidentin Hashim Thaçi, tha se në takim është bërë e qartë se askush nuk mund të bisedojë me Serbinë për kufijtë e Kosovës, raporton RFE.
“Njohja reciproke është e nevojshme. Procesi i dialogut nuk nënkupton diskutim të territorit as kufijve të Kosovës. Presidenti shprehu pozicionin e tij se respekton jo vetëm territorin, integritetin, sovranitetin e vendit, por vetëm i ushtron funksionet e veta në kuadër të Kushtetutës dhe nuk pranon të diskutohet territori i vendit”, tha Haradinaj.
“Ajo çka është me rëndësi është të kemi qëndrim të qartë institucional se territori, kufijtë nuk diskutohen. Nuk janë çështje për diskutim në kuadër të dialogu”, tha Haradinaj pas takimit duke shtuar se pjesëmarrja e opozitës në dialog është shumë e rëndësishme.
Në takim me presidentin Thaçi, ishin edhe kryeparlamentari Kadri Veseli dhe zëvendëskryeministrat Behgjet Pacolli, Fatmir Limaj dhe Dardan Gashi.
Takimi i radhës në Bruksel mes presidentit të Kosovës Hashim Thaçi dhe homologut të tij serb, Aleksandar Vuçiq është paraparë të zhvillohet më 7 shtator.
