Pas takimit me Presidentin slloven, Osmani: Kufijtë e Kosovës janë përcaktuar në vitin 2008!
Pas takimit me Presidentin e Sllovenisë, Borut Pahor në Prishtinë, Presidentja e Kosovës, Vjosa Osmani, tha se diskutuan për përgatitjet e nevojshme për Samitin e Procesit Brdo-Brijuni që mbahet më 17 Maj dhe nevojën e përshpejtimit të integrimit evropian.
“E sigurova presidentin që Kosova e ka prioritet integrimin evropian. Reformat që duhet të ndërmerren nuk i shohim si të imponuar por për nevojën e qytetarëve tanë. E potencuam qartë që Kosova i ka plotësuar kriteret për liberalizimin të vizave. Jo që ka plotësuar kriteret, por dyfishin e tyre. Është një pritje e gjatë dhe i mbetet BE-së të mbajë premtimin. E njoftova presidentin për faktin që akoma kemi nevojë për mbështetje sa i përket vaksinave. Shpresoj qe Sllovenia që ndihmojë Kosovën, sepse siç thotë edhe populli ynë ‘miku i mirë gjendet në ditë të vështira’,” tha Vjosa Osmani duke shtuar se pret nga Sllovenia që të vazhdojë bashkëpunimin në fushën e mbrojtjes dhe arsimit ndërsa për çështjen e kufijve e tha sërish qartë:
“Kufijtë tonë janë përcaktuar në vitin 2008. Kosova do të ulet në tavolinë për të trajtuar tema që janë të rëndësishme për vendin tonë!”
Ndëra Presidenti i Sllovenisë, Borut Pahor, tha se do të këshillohen mbi vështrimet dhe perspektivën evropiane.
“Do të provojmë të shohim se a mund të themi diçka më optimiste sa i përket perspektivës evropiane të shteteve të Ballkanit. Në aspektin e paqes dhe sigurisë, në zonën e Ballkanit Perëndimor është me rëndësi që të vihet deri në një qëndrim të BE-së se zgjerimi është domosdoshmëri gjeopolitike e karakterit primar. BE duhet të përshpejtojë këtë proces dhe ta shohë këtë hapësirë si tërësi,” tha Pahor duke shtuar:
“Pushteti i ri në Kosovë duhet të jetë i gatshëm me tërë fuqinë që t’i jep dialogut një nxitje të re… Të hënën para fillimit të samitit do të bëjmë bisedimet e fundit që ky takim të jetë një mesazh i fuqishëm për BE-në.”
Presidenti i Sllovenisë, Borut Pahor, viziton Kosovën pas publikimit të “non-paper” në shtetin e tij dhe në prag të Samitit Brdo – Brijuni që mbahet më 17 Maj në Brdo afër Kranjit, ku pjesëmarrjen e kanë konfirmuar Vjosa Osmani, Milo Gjukanoviç, Zoran Milanoviç, Aleksandar Vuçiç dhe Xhaferoviç Komshiç. Takimet zyrtare janë parashikuar të mbahen të dielën më 16 Maj.
