Pas takimit me Quintin, Kurti me propozimin pesëpikësh për shtensionimin e situatës në veri

Pas takimit me përfaqësuesit e shteteve të Quintit, Kryeministri i Kosovës, Albin Kurti, bëri të ditur propozimin pesëpikësh të Qeverisë së Kosovës për shtensionimin e situatës në veri, të cilin ia ka nisur Përfaqësuesit të Lartë për Politikë të Jashtme dhe Siguri në Bashkimin Evropian, Josep Borrell, dhe ambasadorëve të Quintit.

“Ditën fillova me një takim me ambasadorët e shteteve të QUINT-it dhe shefin e misionin të BE-së, me të cilët folëm për zhvillimin e e fundit në veri dhe të cilët i njoftova për propozimin e qeverisë së Kosovës për deeskalimin e situatës në katër komunat në veri të vendit, propozim të cilin e kam ndarë edhe me Borellin, me të cilin dje në orën 12 kam pasur një telefonat nga ai në lidhje me situatën në veri,” tha Albin Kurti duke bërë të ditur se dje ishte në kontakt edhe me Lajçakun dhe me ambasadorin amerikan në Kosovë.

Qeveria, tha Kryeministri i Kosovës, është e interesuar për të depërshkallëzuar situatën në veri dhe për normalizim të marrëdhënieve mes dy vendeve, dhe janë disa hapa që duhet të merren për të stabilizuar situatën në veri.

Plani pesëpikësh, tha Kryeministri i Kosovës, Albin Kurti, duhet të nisë me sundim të ligjit në veri.

“Duhet menjëherë të përfshihen e identifikohen dhe ndiqen penalisht grupet kriminale, të tërhiqen menjëherë grupeve të dhunshme dhe të ndalen hapat kriminalë. Sipas propozimit të Qeverisë së Kosovës, Policia e Kosovës dhe KFOR-i apo EULEX-i do të kryejnë vlerësime të përbashkëta të sigurisë çdo 15 ditë, Qeveria e Kosovës do të koordinohet me të gjithë akterët dhe do të shpallë zgjedhje të parakohshme në katër komunat veriore, që do të mbahen në atmosferë të lirë dhe demokratike dhe dhe të shpallen zgjedhjet e parakohshme,” tha Albin Kurti i cili shpreson se Kosova dhe Serbia do të kthehen menjëherë në dialog në të cilin BE siguron zbatimin e marrëveshjes së arritur si dhe në javën që vjen të organizohet takim i nivelit të lartë.

Në fund, Albin Kurti tha se kjo ofertë është në bazë të obligimit që ka si Kryeministri i Kosovës dhe pret përgjigje nga Brukseli për këtë çështje ndërsa është pritje të përgjigjes nga Borell.

Letra e plotë:

I nderuari përfaqësues i Lartë, z.Borrell

Si vazhdim i takimit tonë dypalësh në Bratislavë më 30 maj, si dhe duke reflektuar mbi bisedën tonë telefonike të sotme, do të doja t’ju propozoja juve një plan për rrugën përpara në normalizimin e marrëdhënieve me Serbinë dhe shtensionimin në veriun e Republikës së Kosovës, si vijon:

1.Të sigurohet/krijohet menjëherë sundimi i ligjit në 4 komunat në veri të Republikës së Kosovës, duke përfshirë ndër të tjera identifikimin, ndjekjen penale dhe gjykimin e drejtë të të gjithë anëtarëve të grupeve kriminale që kanë sulmuar Policinë e Kosovës, anëtarët e NATO-s dhe gazetarët. EULEX-i është i ftuar të monitorojë drejtpërdrejt thelbin e proceseve gjyqësore të lidhura me gjykimin.

2.Grupet e dhunshme të tërhiqen menjëherë nga territori i Kosovës dhe të ndalohet secili veprim kriminal ndaj institucioneve të Kosovës. Në bazë të parimit të proporcionalitetit, prania e forcave të Policisë së Kosovës në tri objektet komunale në veri të Kosovës, të zvogëlohet, bazuar në rrethanat.

3.Policia e Kosovës dhe KFOR-i/EULEX-i do t’i kryejnë vlerësimet e përbashkëta të sigurisë, çdo 15 ditë, në mënyrë që të garantojnë një mjedis të sigurt në sundimin e ligjit.

4.Qeveria e Republikës së Kosovës do të koordinohet me të gjithë akterët dhe do t’i shpallë zgjedhjet e parakohshme në katër komunat në veri. Zgjedhjet e reja duhet të organizohen në një atmosferë zgjedhore të lirë, demokratike dhe të papenguar.

5.Kosova dhe Serbia të kthehen menjëherë në dialogun e ndërmjetësuar nga Brukseli. BE-ja të sigurojë një plan renditjeje të drejtë dhe të balancuar për zbatimin e Marrëveshjes Bazë (27 shkurt) dhe Aneksit të Zbatimit të saj (18 mars). Udhëheqësit e të dy shteteve të takohen në një dialog të nivelit të lartë në Bruksel gjatë kësaj jave. Shpresoj se do të jeni në gjendje t’i përgjigjeni me optimizëm kësaj oferte sa më shpejt që të mundeni.