Pas takimit me Rutte, Osmani: Beogradi synon të destabiliozjë jo vetëm Kosovën, por edhe rajonin!

Presidentja e Kosovës, Vjosa Osmani, pas takimit që zgjati rreth një orë me Sekretarin e Përgjithshëm të NATO-s, Mark Rutte, tha se Serbia fatkeqësisht vazhdon të minojë përpjekjet për paqe e stabilitet, dhe nëpërmjet veprimeve hibride, grupeve kriminale dhe propagandës s vazhdueshme e mbështetur edhe nga Rusia, Beogradi po synon të destabilizojë jo vetëm Kosovën, por edhe rajonin.

Dëshmi e qartë për këtë, tha Presidentja Osmani, janë edhe sulmet e viteve të fundit në veri e sulmet ndaj trupave të NATO-s në vitin 2023, prandaj siç i tha ajo shefit të NATO-s, prania e trupave të NATO-s nuk është vetëm një garanci për sigurinë e Kosovës, por edhe një barrierë kundër çfarëdo lloj përpjekje për cenimin e paqes dhe stabilitetit.

“Me të drejtë ju dje në Bosnje Hercegovinë e thatë se është me rëndësi që ky rajon mos të ketë vakum të sigurisë, sepse siç ka dëshmuar historia, shpesh herë ato vakume janë keqpërdorur nga faktor malinj të cilëve nuk iu intereson paqja e siguria, por vetëm kaosi e jostabiliteti. Për këtë qëllim, ne dëshirojmë të thellojmë partneritetin tonë me NATO-n, duke forcuar ushtrinë tonë,” tha Vjosa Osmani duke konstatuar është koha që Kosova ta ketë vendin në NATO.

“NATO është themeluar mbi vlerat mbi të cilat qëndron edhe vetë shteti i Kosovës, prandaj edhe synimi strategjik për anëtarësim  është edhe domosdoshmëri strategjike për paqen dhe stabilitetin në rajon e gjithë kontinentin evropian.”

Rutte: Jemi të gatshëm t’i përgjigjemi çfarëdo zhvillimi të sigurisë

Sekretari i Përgjithshëm i NATO-s, Mark Rutte, tha se nuk mund të parashikohet paqe nëse mbetemi me probleme dhe për këtë kërkohet të punohet së bashku që të kemi paqe afatgjate.

“NATO-ja do të vazhdojë të mbështesë plotësisht normalizimin e marrëdhënieve midis Beogradit dhe Prishtinës, udhëhequr nga BE-ja. Është e vetmja mënyrë për të zgjidhur çështjet e pazgjidhura dhe për të ofruar të ardhme stabile dhe që të mbrohen të gjitha komunitetet. Për ta shtyrë përpara këtë dialog, të dyja palët duhet të shfaqin fleksibilitet, të bëjnë kompromise të duhura dhe të fokusohen në dobitë afatgjate.

E kuptoj plotësisht që kjo kërkon vendime të vështira, por duhet të shohim pamje më të gjerë. Normalizimi sjell stabilitet më të madh, më shumë mundësi investimi dhe më pas siguri më afatgjatë për të gjithë rajonin në dobi të të gjithëve. Ky është mesazhi që do të vazhdoj ta përsëris,” tha Mark Rutte duke u zotuar se përkushtimi i NATO-s për stabilitet e paqe në Kosovë dhe rajon mbetet i qëndrueshëm.

“Trupat tanë punojnë pa pushim për të siguruar ambient me rend dhe siguri në përputhje me mandatin e KFOR-it. Një rajon më i sigurt nënkupton më shumë siguri për të gjithë zonën e NATO-s.

Jemi të gatshëm t’i përgjigjemi çfarëdo zhvillimi të sigurisë. Dhe në këtë kuptim shpresojmë të shohim bashkëpunim edhe më të thellë në mes të institucioneve të Kosovës dhe KFOR-it. NATO-ja do të vazhdojë të luajë rolin e vet në mandatin e vet për sigurinë e të gjithëve. Këtë e bëjmë në bashkërendim të afërt me Policinë e Kosovës, EULEX-in dhe rolet tona përkatëse,” tha Mark Rutte me mesazhin e qartë në fund se të gjitha palë duhet të zgjedhin diplomacinë para dhunës ndërsa përfundoi:

“Do të jem shumë i drejtpërdrejtë, vetëm bashkërisht mund të kemi paqe në rajon. Duhet të ketë zgjidhje politike, e që kërkon lidership nga të gjithë politikanët. Duhet të punojmë së bashku.

Mandati i NATO-s është që të sigurohet se Forca e Sigurisë së Kosovës të jetë efektive në rolin e saj humanitar.”

Pas takimit me Presidenten Vjosa Osmani, Sekretari i Përgjithshëm i NATO-s, Mark Rutte, vazhdoi me takimin me Kryeministrin Albin Kurti.

Përveç takimit me liderë shtetëror, Mark Rutte do të vazhdojë takimet edhe me komandantin e KFOR-it, Enrico Barduani, Ambasadorin e BE-së, Aivo Orav, shefin e EULEX-it, Giovanni Barbano e shefen e UNMIK-ut, Caroline Ziadeh.

Sekretari i Përgjithshëm i NATO-s, Mark Rutte, viziton Kosovën, pas vizitës që zhvilloi në Bosnje Hercegovinë disa ditë pasi ai deklaroi se stabiliteti në Kosovë, Bosnje Hercegovinë dhe Serbi është në interesin e NATO-s dhe aleatëve të saj.