Pas takimit me Thaçin, Kurti: Së shpejti do ta propozojmë Kryeministrin!

Takimi ndërmjet Albin Kurtit dhe Presidentit Hashim Thaçi ka përfunduar për më pak se 15 minuta dhe nuk ndodhi asgjë! Emri i Kryeministrit, Presidentit Thaçi do ti propozohet në mënyrë shkresore ndërsa LDK-së Albin Kurti i hapi derën kur do që asaj i mbushet mendja për qeverisje me Vetëvendosje.

“Sot isha në takim me Presidentin e Republikës, me ftesën e këtij të fundit ishte një takim i shkurtër konsultativ, pa efekte juridike. Në këtë takim disa minutash unë dëgjova presidentin i cili shprehu interesimin për formimin sa më shpejt të qeverisë, por gjithashtu kërkoi që ne ta bëjmë propozimin.”

Në bazë të kushtetutës sqaroi Albin Kurti kjo duhet të bëhet me shkresë dhe këtë tha ai do ta bëjë pas mbledhjes së Kryesisë të Lëvizjes Vetëvendosje.

“Këtë kërkesë do ta bëj edhe në kryesinë e Lëvizjes Vetëvendosje dhe sa më parë t’ia dorëzojmë presidentit në mënyrë që ai sa më parë ta mandatoj kandidatin për kryeministër,” tha Albin Kurti pas takimit duke mos përcaktuar afatin se kur do ta bëjë Vetëvendosje propozimin ndërsa shprehu gatishmërin për takim me LDK-në kur do që ajo të dëshiron.

Albin Kurti edhe me këtë rast përjashtoi mundësinë e përfshirjes së Presidentit në Marrëveshjen e koalicionit qeverisës duke theksuar se për këtë çështje do të diskutohet kur të vie koha.

Duke përjashtuar mundësinë e zgjedhjeve të reja Kurti tha se është i interesuar që ta bëjë Qeverinë e re; Por, nëse kjo i imponohet, Vetëvendosje mund të hyjë sërish në garë.