Pas takimit me Vuçiç, Rakiç: Do të bllokojmë të gjitha vendkalimet nga veriu drejt Kosovës!
Pas takimit me presidentin e Serbisë, Aleksandar Vuçiç, në Beograd, kryetari i Listës Srpska, Goran Rakiç, nuk kishte model tjetër përveç atij të serbëve Kroacisë dhe kërcënoi me bllokimin e rrugëve në veri të Kosovës, nëse Prishtina zyrtare ndërmerr ndonjë veprim për konfiskimin e makinave me targa serbe.
“Nëse Prishtina fillon me dhunë, me ndonjë veprim lidhur me konfiskimin e automjeteve, ne do të bllokojmë të gjitha vendkalimet dhe hyrjet nga veriu drejt Kosovës qendrore,” tha Goran Rakiç, siç duket i inkurajuar nga Vuçiç, nuk po ndalonte si dikur Miran Martiçi në Knin, kur takonte kriminelin serb Slobodan Milosheviç:
“Nëse Forcat e Sigurisë së Kosovës, njësitë speciale të policisë apo dikush tjetër fillon të konfiskojë pronën tonë dhe prona tona janë pikërisht targat që janë arsyeja e takimit, ne do të përdorim të gjitha mjetet në mënyrë demokratike dhe paqësore, për të rezistuar dhe do të jetë rezistenca e popullit,” tha Rakiç duke folur se është i gatshëm për luftë shumë më komod se Vuçiç ose Putin:
“Kur themi rezistencë paqësore demokratike të popullit, ne me të vërtetë atë e duam, por nuk e di se në çfarë do të shndërrohet e gjitha dhe si do të zhvillohet situata në terren. As unë nuk e di dhe askush nga ne që jetojmë atje poshtë se në çfarë do të shndërrohet situata nëse dikush me dhunë fillon të na marrë pronën.”
Takimi mes përfaqësuesve të Listës Srpska dhe presidentit të Serbisë, Aleksandar Vuçiç, vjen ndërsa kanë ngelur edhe katër ditë deri te skadimi i afatit për regjistrimin e makinave me targa të Kosovës, dhe se vërtetë Rakiç po bëhet gati për luftë tregon dhe fakti se në takim ishte i pranishëm edhe krimineli Milan Radoiçiç, në kërkim nga autoritetet kosovare për shumë krime dhe së fundi edhe për frikësimin e dëshmitarëve në çështjen “Brezovica”, lidhur me lejet e paligjshme në qendrën turistike Brezovica të Komunës Shtërpcë.
Ndërkohë shefi i Goran Rakiçit, Aleksandar Vuçiç, nuk u deklarua për media duke paralajmëruar mbledhjen e Sigurisë Kombëtare dhe më pas një konferencë për media.
Ndryshe, nga 1 shtatori, Kosova ka nisur procesin për regjistrimin e makinave me targa të lëshuara nga Serbia në ato me targa RKS- Republika e Kosovës. Pas 31 tetorit, Qeveria e Kosovës është shprehur se makinat me targa serbe nuk do të lejohen që të qarkullojnë në territorin e Kosovës.
Targat serbe me simbolet e qyteteve të Kosovës, si KM, PZ, PR etj. konsiderohen ilegale nga Qeveria e Kosovës. Sipas një vlerësimi, rreth 10.000 makina me targa të këtij lloji mendon se lëviizn në katër komunat që ndodhen në veri të Kosovës .
Bashkimi Evropian dhe Shtetet e Bashkuara kanë kërkuar që Kosova dhe Serbia të shmangin tensionet ndërsa i kanë kërkuar Kosovës që të shtyjë afatin për 10 muaj.
Më 25 Tetor, Kryeministri i Kosovës, Albin Kurti, e bëri të qartë se shtyrje të afatit për targat nuk do të ketë. Pas fjalës së mbajtur në Samitin për Ballkanin Perëndimor që u mbajt në Prishtinë, Kurti sqaroi se nuk duan të befasojmë aleatët, por duan të befasojnë kriminelët!
