Pas takimit me Vuçiçin, Maas: Koha për të arritur rezultat në dialogun Kosovë-Serbi!
Sot kur qeveritë e dy vendeve janë formuar me shumicë të qëndrueshme parlamentare, është koha e duhur për të vazhduar dialogun Kosovë-Serbi mbi normalizimin e marrëdhënieve dhe për të arritur rezultat, tha Ministri i Jashtëm, Heiko Maas, pas takimit në Beograd me Presidentin e Serbisë, Aleksandar Vuçiç, duke shtuar se Gjermania ka besim të plotë në BE dhe përfaqësuesin e saj për dialog Miroslav Lajçak.
Presidenti i Serbisë, Aleksandar Vuçiç, nga ana e tij, tha se Serbia është e gatshme të vazhdojë dialogun me Prishtinën, të cilit do t’i qaset në mënyrë konstruktive në dëshirën për të arritur një zgjidhje kompromisi.
“Serbia është kundër konfliktit të ngrirë, sepse dikush mund ta heq atë. Thelbi i përparimit të shqiptarëve dhe serbëve është paqja,” tha Vuçiç duke shtuar se për Serbinë është e rëndësishme të përmbushë Marrëveshjen e Brukselit dhe formimin e Asocacionit të Komunave Serbe.
Presidenti i Serbisë, raportojnë mediat serbe, rikujtoi se Gjermania e njohu Kosovën si të pavarur, por ky vend është shumë interesuar për të vazhduar dialogun midis Beogradit dhe Prishtinës nën kujdesin e Bashkimit Europian. Por, gjithashtu Vuçiç rikujtoi se Gjermania është partneri më i afërt ekonomik i Serbisë, dhe janë 70.000 njerëz që aktualisht punojnë në ndërmarrjet gjermane në Serbi.
Ndryshe, në takim me shefin e diplomacisë gjermane Heiko Maas dhe Presidentin e Serbisë u dikutua edhe për sundimin e ligjit ku Vuçiç u shpreh i bindur se Serbia do të ketë rezultate gjithnjë e më të mira në atë fushë.
