Pas takimit, Thaçi: Albin Kurti ka edhe 48 orë!

Pas takimit të shkurtër me kryetarin e Lëvizjes Vetëvendosje, Albin Kurti, Presidenti i Kosovës, Hashim Thaçi ka sqaruar se i ka dhënë Kurtit edhe 48 orë kohë për ta përcaktuar kandidatin për Kryeministrin e ardhshëm të Kosovës që dukshëm dallon nga deklarata e Albin Kurtit:

“Kam vendosur që t’i ofroj z. Kurti kohë shtesë edhe 48 orët e ardhshme për nominimin e kandidatit/kandidates për kryeministër të ardhshëm të Qeverisë së Republikës së Kosovës, para se të marr veprimet e radhës kushtetuese dhe ligjore,” thekson Presidenti i Kosovës, Hashim Thaçi, përmes rrjetit social Facebook në përpjekje për të implementuar rezultatin zgjedhor të Zgjedhjeve të Përgjithshme të 6 tetorit 2019.

Kush e thotë të vërtetën?! Qytetarët e Kosovës, ata që pritën 92 ditë Isa Mustafën, duhet të presin edhe 48 orë për ta konfirmuar nëse do të përfshihet edhe Lëvizja Vetëvendosje në këtë ngatërresë institucionale, që deri më sot është subjekti i vetëm që i qëndroi imun lojërave të pista politike.

Ja postimi i plotë:

Sapo zhvillova një takim të shkurtër me kryetarin e Lëvizjes Vetëvendosje, Albin Kurtin, në përpjekje për të implementuar rezultatin zgjedhor të Zgjedhjeve të Përgjithshme të 6 tetorit të vitit të kaluar.

Tashmë është bërë hapi i parë i rëndësishëm i konstituimit të Kuvendit të Republikës së Kosovës, për çka përsëri i përgëzoj deputetët e Kuvendit të Kosovës.

Nevoja e formimit të Qeverisë është jetike për shtetin dhe qytetarët e Kosovës. Z. Kurti sot nuk ishte i gatshëm të ofrojë propozimin e të nominuarit nga Lëvizja Vetëvendosje.

Si president i vendit do ta ushtroj autoritetin tim kushtetues dhe ligjor të ruajtjes dhe kultivimit të unitetit politik e qytetar dhe orientimit euroatlantik të shtetit të Kosovës.

Prandaj, kam vendosur që t’i ofroj z. Kurti kohë shtesë edhe 48 orët e ardhshme për nominimin e kandidatit/kandidates për kryeministër të ardhshëm të Qeverisë së Republikës së Kosovës, para se të marr veprimet e radhës kushtetuese dhe ligjore. HTH