Pas takimit me Vuçiçin, Osmani: Macron dhe Scholz kërkuan zgjedhje të reja në veri!

Presidentja e Kosovës, Vjosa Osmani ka bërë të ditur se sot është zhvilluar një takim i shkurtër me Presidentin e Serbisë, Aleksandar Vuçiç, në Moldavi, ku ishin prezent edhe Presidenti i Francës, Emmanuel Macron, Kancelari i Gjermanisë, Olaf Scholz, dhe Përfaqësuesi i Lartë për Politikë të Jashtme dhe Siguri i BE-së, Josep Borrell.

“Në fund të takimit me Macron dhe Scholz ata propozuan që të kishte edhe një diskutim joformal me Presidentin e Serbisë, natyrisht në takim ishte edhe përfaqësuesit i Lartë i BE-së, Josep Borrell. E kishim një takim të përbashkët diku 10 minuta, ku edhe  njëherë u dëshmua se Vuçiç nuk është i interesuar për zgjidhje dhe as për paqe, por në fakt është burimi kryesor i jostabilitetit në gjithë rajonin tonë.

Por, unë do të vazhdojë të punoj me partnerët tanë, me Gjermaninë, me Francën, me SHBA-në si aleat yni kyç, por edhe me shtetet e tjera prej disa prej çështjeve që i propozuan edhe presidenti Macron, edhe kancelari Scholz, e që i ka propozuar edhe sekretari i shtetit amerikan, Blinken. Ka mundësi që të gjinden zgjedhje përpara.

Vullnetin e kemi të përbashkët dhe ai është Kosova sovrane dhe e pavarur të jetë e suksesshme në gjithë territorin e saj. Natyrisht asnjëherë duke mos i ikur obligimeve që t’i mbrojmë të gjithë qytetarët, përfshirë edhe pakicën serbe,” tha Presidentja Osmani e bindur se zgjidhjet për shtensionim të situatës ekzistojnë por ato duhet të jenë në përputhshmëri me Kushtetutën e Kosovës, derisa ka sqaruar se takimi trelateral ka qenë propozim i përbashkët i Macronit dhe Scholzit.

Fillimisht takimi trelateral Macron-Scholz-Osmani ka qenë propozim i palës franko-gjermane, tha ajo, derisa në fund të këtij takimi ka qenë një insistim i tyre që të ketë edhe një diskutim formal me presidentin e Serbisë.

“E kam bërë të qartë se unë nuk negocioj sepse negociatat bëhen në Bruksel dhe Gjykata Kushtetuese e ka përcaktuar qartë se kush i zhvillon ato negociata. Megjithatë si presidente e vendit natyrisht i respektoj propozimet e aleatëve tanë, të cilët kanë dhënë dhe vazhdojnë të japin shumë për stabilitetin në Kosovë dhe rajon.

Jemi ulur kemi diskutuar. Unë para tyre kam kërkuar nga Vuçiçi që të largojë ushtrinë nga kufiri, që t’i largojë bandat kriminale nga Kosova. Që të zbatojë listën e gjatë të marrëveshjeve të cilat nuk i ka zbatuar. E kam pyetur se a ka marrëveshje apo jo sipas tij sepse ai paraqitet para palëve të tjera kinse i respekton marrëveshjet por publikisht del dhe thotë se nuk do t’i zbatojë.

Pra, janë gjëra që i kemi bërë në mënyrë shumë korrekte dhe konstruktive, siç janë kërkesat për sqarime, duke treguar se ne jemi të gatshëm ta gjejmë rrugën përpara bashkë me aleatët. Ne bisedojmë me ta për rrugën përpara, kurse obligimet që Kosova i ka marrë në marrëveshje, edhe njëherë sot kam treguar se të gjitha institucionet tona janë të përkushtuara t’i zbatojnë dhe nuk do të ikim prej tyre.

Në anën tjetër Vuçiç si zakonisht ankohet, bërtet e shumëçka tjetër, por kjo është natyra e tij,”, tha Presidentja duke shtuar se Vuçiç nuk kishte asnjë përgjigje dhe si zakonisht kishte menjëherë akuza e shumëçka tjetër, si mentalitet i së kaluarës, por asnjëherë nuk kishte përgjigje në kërkesat tona.

Kërkesë e qartë e Gjermanisë dhe Francës, ishte që kurdo që organizohen zgjedhjet të ketë participim, mos t’u ndalohet serbëve dhe të mos ketë presion mbi ta që ata të participojnë në zgjedhje, tha Presidentja e Kosov por as në këtë kërkesë Vuçiç nuk kishte përgjigje.

Brenda ligjeve dhe Kushtetutës së Kosovës ekziston mundësia që të ketë zgjedhje të reja, sqaroi Vjosa Osmani, mirëpo është me rëndësi që serbët në veri të marrin pjesë në to, ta shfrytëzojnë participimin.

“Pra ata duhet të marrin pjesë dhe t’i zgjedhin kryetarët që dëshirojnë dhe të sigurohen për respektimin e të drejtave tëe tyre nëpërmjet përfaqësuesve që ata i zgjedhin,” është shprehur Presidentja e Kosovës, Vjosa Osmani, duke mos e përjashtuar këtë veprim si zgjidhje për shtensionimin e situatës ndërsa përfundoi:

“Ligjet tona lejojnë zgjedhje të reja nëse ka një përqindje të caktuar të qytetarëve që janë në listën e votimeve e iniciojnë një procedurë të tillë. Pra nëse ka procedura të tilla institucionet tona detyrohen të veprojnë.”

Franca dhe Gjermania kërkojnë zgjedhje të reja në veri

Presidenti i Francës, Emmanuel Macron, tha se Franca dhe Gjermania u kanë kërkuar udhëheqësve të Kosovës dhe serbëve që të organizojnë zgjedhje të reja në katër komunat veriore Zveçan, Leposaviç, Zubin Potok dhe Mitrovicë e Veriut.

Zgjedhjet duhet të zhvillohen në këto komuna të cilat, siç tha Macron, janë prekur nga trazirat ditëve të fundit.

“Franca dhe Gjermania u kërkuan udhëheqësve të Kosovës dhe Serbisë të organizojnë zgjedhje të reja në rajonet e prekura nga trazirat sa më shpejt që të jetë e mundur,” tha Emmanuel Macron, i cili pranoi se u kërkua që të qartësohen edhe rregullat për zgedhje.

Gjatë javëve të ardhshme do të ketë vendim të qartë për situatën në veri të Kosovës, tha Presidenti i Francës, Emmanuel Macron, dhe për këtë gjë u pajtuan gjatë takimeve me Kancelarin e Gjermanisë, Olaf Scholz, dhe Presidenten e Kosovës, Vjosa Osmani, dhe Presidentin e Serbisë, Aleksandar Vuçiç.

Ndryshe, takimi i Presidentes së Kosovës, Vjosa Osmani me Presidentin e Francës Emmanuel dhe Kancelrain e Gjermanisë, Emmanuel Macron e më pas dhe takimi i përbashkët trelateral me Presidentin e Serbisë, Aleksandar Vuçiç, u zhvillua në Chishinau të Moldavisë ku po mbahet Samiti i dytë i Komunitetit Politik Evropian, EPC.