Pas temperaturave rekorde, Agjencia e OKB-së për Motin: Alarm i kuq!

Rritja e temperaturave duhet të nxisë “alarm të kuq” global, tha sot Agjencia e Kombeve të Bashkuara për Mot dhe Klimë, pas rekordeve të thyera sërish në muajin gusht.

Bota ka regjistruar sërish rekord në temperaturat mesatare të gushtit, për herë të dytë radhazi, kanë treguar të dhënat paraprake të një agjencie të Bashkimit Evropian për Klimën, raporton RFE.

Australia, Japonia dhe disa pjesë të Kinës dhe Norvegjisë kanë regjistruar gushtin më të nxehtë ndonjëherë në histori, sipas agjencive meteorologjike.

“Është e qartë se temperaturat po rriten përtej asaj që do të dëshironim,” tha udhëheqësja e Organizatës Botërore të Meteorologjisë, Celeste Saulo, duke shtuar:

“Kjo po ndodh sepse veprimi ynë nuk është i mjaftueshëm”.

Ndonëse temperatura e saktë mesatare globale për këtë gusht nuk dihet, Shërbimi i BE-së për Motin, tha se shifra do të jetë mbi rekordin e vitit të kaluar – 16.82  °C.

Saulo ka bërë thirrje për monitorim më të mirë dhe mbështetje të agjencive për motin, meqë beson se “duhen më shumë burime”.

Teksa ka marrë pjesë në një forum, ajo ka bërë të ditur se Singapori do të jetë qendër rajonale për monitorim të ndotjes së shkaktuar nga zjarret e tokave të punuara dhe tymit.

Duke qenë vetëm njëra prej dy qendrave të tilla në botë, raporton RFE, kjo qendër do të ofrojë informacion më kualitativ për zjarret dhe parashikimet për ndotje.