Pas tërmeteve/ Shtabi i Emergjencave: Janë dëmtuar 5 shtëpi në Kuç…

Pas dy tërmeteve që goditën jugun e Shqipërisë, Shtabi i Emergjencave pranë Ministrisë së Mbrojtjes jep detajet e para për tërmetet me epiqendër në Borsh përkatësisht detin Jon, duke ju referuar të dhënave të Institutit të Gjeoshkencës, Energjisë, Ujit dhe Mjedisit, IGJEUM.

“Me date 04.01.2018 ora 19:26:39 (GTM) Instituti i Gjeoshkencës, Energjise, Ujit dhe Mjedisit ka regjistruar një lëkundje tërmeti me magnitudë 4.8 rihter me koordinata 40.05 veri dhe 19.88 lindje me thellësi 27 km me epiqendër në Borsh.

Tërmeti është shoqëruar me një pasgoditje me magnitudë 4 rihter me koordinata 39.95 veri dhe 19.7 lindje me thellësi 33 km dhe epiqendër në detin Jon. Nisur nga të dhënat e deritanishme, nuk paraqitet rrezik për Tsunam.”  

Ndërsa bazuar nga të dhënat në terren konstatohet se nuk ka dëme në njerëz por  vetëm dëme materiale:

“Nga te dhënat paraprake nuk ka njerëz të lënduar por vetëm dëme materiale në 5 banesa në fshatin Kuç. 4 prej banesave kanë dëmtime të lehta dhe 1 është dëmtuar më rëndë. Jemi ne kontakte të vazhdueshme me sallën e policisë, specialistët e emergjencave civile dhe kryetarët e njësive administrative,” thekson në njoftimin e tij, Shtabi i Emergjencave pranë Ministrisë së Mbrojtjes.