Pas vendimit të Kushtetueses, studentët e Mjekësisë: Nëse cenohet e drejta jonë, do mbushim sheshet…

Pas vendimit të Gjykatës Kushtetuese për të pranuar pjesërisht kërkesën e një grupi studentësh të Fakultetit të Mjekësisë për të shfuqizuar disa nene në ligjin për trajtimin e veçantë të studentëve, vetë studentët e Mjekësisë kanë reaguar sot përmes një deklarate duke e bërë të qartë se nëse e drejta e tyre cenohet janë gati që sërish të mbushin sheshet.

“Ne jemi dakord me vendimin. Gjykata Kushtetuese i kërkoi qeverisë atë që ne i kemi kërkuar prej kohësh, që të na dëgjojnë dhe të konsultohemi. Por në këtë moment do ishte e drejtë të dëgjoheshin të gjitha palët e interesit. Ka qenë situatë e vështirë, por beteja nuk përfundon akoma,” shprehen studentët duke shtuar se po presin vendimin e arsyetuar të Gjykatës Kushtetuese dhe ishin të prerë për veprimet e mëtejme.

“Të shohim se çfarë paraqet vendimi përfunduar që më pas të dimë edhe ne sesi të veprojmë. Këmbëngulja dhe guximi jonë nuk do përfundojë, jemi gati të mbushim sheshet nëse e drejta jonë cënohet.”

Ndryshe, Gjykata Kushtetuese dje vendosi të pranojë pjesërisht kërkesën e një grupi studentësh të Fakultetit të Mjekësisë për të shfuqizuar disa nene në ligjin për trajtimin e veçantë të studentëve, duke vlerësuar se nenet e kundërshtuara sjellin kufizim të të drejtave kushtetuese për arsim dhe punësim.

Gjykata vendosi të shfuqizojë afatet dy/tre dhe 5-vjeçare të parashikuara në ligj për të punësuar brenda vendit studentët e mjekësisë para se t’u dorëzohej diploma e tyre, një përpjekje kjo për të frenuar emigrimin e jashtë vendit të punonjësve të rinj të mjekësisë.

Afati 5-vjeçar i kufizimit me ligj, sipas Gjykatës Kushtetuese, është më i ashpër se sa nevoja për të arritur qëllimin legjitim. Në përvojën e vendeve të tjera, thekson Gjykata, ky afat nuk e tejkalon gjysmën e kohëzgjatjes së studimeve.