Pas vendimit të Veliajt/ Reagimi, Mesiti: “Jam qytetare e lirë!”

Nënkryetarja e Bashkisë së Tiranës, Kozeta Mesiti e cila u shkarkua sot me një vendim arbitrar të kreytarit Erion Veliaj, pasi mori pjesë në Protestën e Madhe të Opozitës më 16 shkurt, tha se ajo ka të drejtën si qytetarë e lirë të veprojë si të dojë.

 “Jam krenare që kam përfaqësuar PDIU si Nënkryetare e Bashkisë së Tiranës, në këto muaj. Askush nuk mund të më ndalojë si qytetare e lirë, në ditë pushimi, ti bashkohem qindra mijëra shqiptarëve që protestuan kundër qeverisë, skamjes , zbrasjes së vendit nga rinia dhe gjithçka tjetër që rëndon çdo ditë e më shumë jetën e qytetarëve,” thekson Kozeta Mesiti e cila ndjehet krenare që ishte pjesë e asaj proteste madhështore:

“Personalisht, ndjehem e nderuar që isha pjeseë asaj proteste madhështore si shprehja më e mirë e qytetarisë për të reaguar dhe mos u nënshtruar.”

Ndryshe, përveç Nënkryetares Kozeta Mesitit u shkarkua edhe Drejtori i Tregjeve, Sokol Hysa, nga radhët e PDIU, vendim ky i firmosur nga kryebashkiaku Erion Veliaj, për shkak të “pjesëmarrjes në protestën e dhunshme të organizuar nga opozita të shtunën.”