Pas Vettingut, kreu i SPAK: Shqetësimi më i madh nuk janë të shkarkuarit, por të konfirmuarit në detyrë
Me përfundimin e procesit të Vettingut, në fund të muajit dhjetor pritet që kreu i Prokurisë së Posaçme, Altin Dumani, të marrë dhe kompetencat e Komisionerit Publik në KPA, duke zgjeruar përgjegjësitë e SPAK në monitorimin dhe hetimin e zyrtarëve të drejtësisë.
Gjatë një takimi të organizuar nga Komiteti Shqiptar i Helsinkit, Dumani bëri me dije se SPAK ka aplikuar ligjin anti-mafia për disa subjekte të shkarkuar nga detyra, përfshirë gjyqtarë dhe prokurorë.
“Materialet nga procesi administrativ i vettingut i kemi përdorur si indicie për të gjetur prova në hetimin penal. Rezultatet e hetimit administrativ janë një bazë e mirë për të gjetur prova ndaj subjekteve të shkarkuar nga vettingu,” tha kreu i SPAK ndërsa shtoi se Prokuroria e Posaçme ishte aktive edhe me hetime të iniciuara nga vetë institucioni, veçanërisht në rastet e korrupsionit.
“Ne nuk kemi qenë të verbër ndaj vendimeve të organeve të vettingut. Kemi regjistruar hetime kryesisht për veprat penale të korrupsionit dhe jemi të kujdesshëm në filtrimin e vendimeve të vettingut,” tha kreu i SPAK por sqaroi se vëmendja e institucionit që drejton është përqendruar kryesisht tek zyrtarët e konfirmuar në detyrë.
“Shqetësimi më i madh nuk janë të shkarkuarit, por ata që janë konfirmuar në detyrë. Ky është fokusi ynë, sepse ata janë ende në sistem dhe mund të kryejnë akte korruptive.”
Me këtë rast, kreu i SPAK, bëri thirrje për një angazhim më të madh të shoqërisë civile në përpjekjet kundër korrupsionit dhe Prokuroria e Posaçme, shtoi, është e hapur për bashkëpunim me qëllim përmirësimin e performancës së institucionit.
“Shoqëria civile është e ftuar të bashkëpunojë me SPAK për tematika të caktuara. Këto analiza i shërbejnë institucionit tonë për përmirësimin e performancës. Jemi të hapur për bashkëpunime të tilla.”
Në fund, kreu i SPAK, Altin Dumani u bëri thirrje qytetarëve që të denoncojnë çdo akt korruptiv, duke theksuar rëndësinë e angazhimit të institucioneve përgjegjëse në luftën kundër korrupsionit.
“Secili institucion duhet të përmbushë detyrimet e veta. Qytetarët duhet të denoncojnë çdo akt korruptiv në SPAK, dhe institucionet përkatëse duhet të jenë në lartësinë e duhur për të na furnizuar me informacione dhe kallëzime.”
