Pas vjedhjes së kabllove në Francë, bllokohet Eurostar
Një ndërprerje e madhe e shërbimeve të Eurostar është shkaktuar pasi 600 metra kabllo sinjalizimi u vodhën në Francë, duke ndërprerë seriozisht shërbimet hekurudhore midis Londrës, Parisit, Brukselit dhe Amsterdamit.
Incidenti ndodhi pranë stacionit Lille Europe dhe dëmi është aq i madh sa riparimet nuk priten deri në orët e vona të pasdites, raporton The Guardian.
Bllokim i plotë përpara Samitit historik të NATO-s
Eurostar tha se priten vonesa të konsiderueshme dhe anulime të shumta të trenave dhe i këshilloi pasagjerët të shtyjnë ose anulojnë udhëtimet e tyre nëse është e mundur. Terminalet dhe stacionet janë të mbushura me pasagjerë të frustruar ndërsa kompania u ofron atyre një rimbursim ose një shkëmbim falas të biletave. Inxhinierët dhe ekspertët mjeko-ligjorë janë në vendin e ngjarjes dhe policia po heton vjedhjen, e cila ndodhi përgjatë binarëve pranë stacionit Mont-de-Terre, midis Lille dhe Lezennes.
Sipas raporteve të operatorit hekurudhor SNCF, bëhet fjalë për një dëmtim kompleks sepse çdo kabllo përmban disa tela që duhet të lidhen me kujdes. Në të njëjtën kohë, autoritetet holandeze po hetojnë një prishje të ngjashme që ndodhi një ditë më parë pranë Aeroportit Schiphol të Amsterdamit. Pati një ndërprerje të energjisë elektrike në rreth tridhjetë kabllo, gjë që e ndërlikoi më tej trafikun dhe ngriti dyshime për sabotim të mundshëm.
Në veçanti, kur Samiti i NATO-s po zhvillohet në Hagë. Ministri holandez i Drejtësisë, David van Weel, tha se nuk e përjashton mundësinë që aktivistët apo edhe një shtet të qëndrojnë pas këtij incidenti. Autoritetet franceze njoftuan sot se 15 ekspertë ishin dërguar në zonën pranë Lille për të provuar urgjentisht të rivendosin trafikun normal.
Ndryshe, ky incident vjen një ditë pas ditës tragjike në të cilën humbën jetën dy persona në aksidente të ndara në të njëjtën linjë, duke paralizuar gjithashtu trafikun midis Lille dhe Parisit. Një sabotim i ngjashëm u raportua në Spanjë në muajin maj, kur një sinjal kyç u vodh gjatë një fundjave feste, duke shkaktuar vonesa dhe ndërprerje për më shumë se 10.000 pasagjerë.
