Pas votimit, Basha: Demokratizimi i PD sot, nesër shtyllë e programit tonë!

Pasi ushtroi të drejtën e tij në Partinë Demokratike Dega Tirana 8, për të votuar ata që janë propozuar t’i përfaqësojnë në Parlamentin e Shqipërisë, Kryetari Lulzim Basha tha se demokratizimi i PD sot do të jetë nesër një nga shtyllat e programit tonë.

“Sot kam ushtruar edhe unë të drejtën time si anëtar në një proces që bëhet për herë të parë në Shqipëri dhe në rajon, votën e anëtarësisë. Ky proces është zhvilluar në gjithë Shqipërinë, sot kulmon në Tiranë pjesëmarrja është tregues i qartë i pjekurisë politike dhe vendosmërisë tonë që sot të bëjmë realitet brenda radhëve tona atë që do bëjmë realitet nesër për të gjithë shqiptarët,” tha Lulzim Basha duke shtuar se shqiptarët duan dhe presin ndryshim dhe ndryshimi nis nga vota.

“Falënderoj demokratët, partnerët tanë që nga kristian demokratët gjermanë, konservatorët  britanikë, republikanët amerikanë,  që na ndihmuan të hedhim këtë hap, që nuk është vetëm një risi për PD, dhe partitë në Shqipëri, por për të gjithë rajonin. Demokracia nis nga brenda shtëpisë. Ky proces , i cili bëhet për herë të parë dhe ka natyrisht, vështirësitë dhe sfidat e veta, po shkon drejt përfundimit duke mbajtur zotimin e dhënë ku zëri dhe vota e anëtarëve të PD do të kenë rolin e tyre vendimtar për përcaktimin e përfaqësuesve të lartë politikë të PD. Kjo është një garë brenda PD, beteja e vërtetë na pret,” tha Kryetari i Partisë Demokratike duke e bërë të qartë se demokratët shqiptarë janë të vetëdijshëm për pritshmëritë dhe urgjencën e cdo shqiptari për të sjellë një ndryshim real.

“I siguroj shiptarët se procesi që po përfundojmë , demokratizimi i PD sot do të jetë nesër një nga shtyllat e programit tonë, që vota e cdo qytetari të ketë peshën e saj. dhe qeveria mos jetë peng i një grushti njerëzit, të jetë peng e një grushti njerëzisht. “

Procesin e votimit të kandidatëve të PD-së, Kryeministrit Edi Rama e cilësoi farsë, por Lulzim Basha e kupton këtë vlerësim nga njeriu i cili për 22 vjet karrierën e ka ngritur mbi parime antidemokratike dhe vazhdon të refuzoj t’i bindet rregullave të garës.

“Mos prisni ju që ai të vlerësojë një proces demokratik. Për 22 vjet karriera e tij është ngritur mbi parime antidemokratike. Për 22 vite ai refuzon t’i bindet rregullave të garës. Ai nuk organizon garë në PS, i ka harruar zgjedhjet. Dje siç e patë u zhvilluar një aktivitet dhe fjalim 3 orësh vetëm për të justifikuar mbajtjen në kryesi të njerëzve që janë në listën e zezë të DASH si Vangjush Dako. Mos më kërkoni të krahasoj të pakrahasueshmen. Kjo është një ditë me diell, jo thjesht për qytetarët dhe klimën e kësaj të shtune por një ditë me diell për atë që vjen, një model i ri, një sjellje e re, parathënie për atë që do vijë pas 25 prillit, një model i ri qeverisje,” tha Basha ndërsa iu përgjigj edhe interesit të gazetarëve për skualifikimin e Ish_deputetit Klevis Balliu nga anëtarësia e PD Dega Pogradec:

“Është një proces që nuk ka të humbur. Padyshim nga 3600 propozime mund të themi që shumica dërrmuese e tyre posedojnë kualitetet e përfaqësimit politik por ju e dini fare mirë se nuk parlament në botë që të ketë 3600 deputetë. Vetë procesi është dizenjuar në mënyrë të tillë që një numër i madh i të propozuarve nuk janë të skualifikuar, nuk janë të humbur por përbëjnë pjesë të burimeve njerëzore të PD-së për të drejtuar nesër qeverisjen e vendit.”

Ndryshe, konsultimit me anëtarësinë sot po i nënshtrohet lista e kandidatëve bazuar në vendimin e Komisionit të Vlerësimit të Kandidatëve, që sipas Nenit 62 të Statutit të PDSH përmbushin të gjithë elementët e nevojshëm për ecurinë në karrierë, për përfaqësim politik të Partisë Demokraike, në nivel qendor apo lokal.

Pas mbylljes së procesit të votimit nga anëtarësia, Komisioni i Vlerësimit të Kandidatëve do të mblidhet sërish për të vlerësuar kandidatët mbi kriterin e performancës politike dhe maksimalizimin e votës.

Vendimi përfundimtar i Komisionit do t’i shkojë për miratim Kryesisë së PD.

Kjo është hera e parë që anëtarët e një partie politike në Shqipëri propozojnë dhe votojnë për ata që duan t’i përfaqësojnë në parlament.