Pas vrasjes së 25-vjeçarit, qytetarëve të SHBA, Ambasada: Kemi raporte për protestën, shmangni…

Ambasada e SHBA në Tiranë ka reaguar pas protestës së zhvilluar mbrëmjen e së mërkurës në kryeqytet kundër vrasjes së 25-vjeçarit Klodian Rasha nga policia duke i bërë thirrje qytetarëve amerikanë të shmangin tubimet e mëdha, pasi demonstratat mund të përhapen edhe në zonat e tjera të vendit.

“Ambasada ka marrë raporte për protestën që ndodhi përpara zyrave qeveritare në Bulevardin Dëshmorët e Kombit, në Tiranë. Raportet tregojnë se disa protestues kanë hedhur objekte në drejtim të policisë dhe disa efektivë u plagosën. Efektivët e policisë kanë përdorur gaz lotsjellës për të kontrolluar turmën,” thekson Ambasada e SHBA në Tiranë përmes një njoftimi duke i bërë thirrje qytetarëve amerikanë.

“Qytetarët amerikanë duhet të shmangin tubimet e mëdha, pasi demonstrata të ngjashme mund të përhapen në zona të tjera. Personeli i ambasadës amerikane dhe anëtarët e familjes janë këshilluar të shmangin të gjithë vendet, ku demonstratat janë të vazhdueshme.”

Ndërkohë mëngjesin e sotëm bëhet e ditur se janë arrestuar tre persona që regjimi i quan organizatorë të protestës, Robert Poshnjari, Altin Koçi dhe Vilson Kulemani, ndonëse asnjëri nuk u identifkua si i tillë për asnjë moment, dhe nga ana tjetër në rrjetet sociale sërish ka dalë njoftimi se protesta vazhdojnë sot në orën 16:00.