Pas zgjedhjeve goditet grupi më i rrezikshëm kriminal, kreu i SPAK: U dakordësuam me policinë italiane!

Sot kreu i SPAK, Altin Dumani, tha se u godit një prej grupeve kriminale më të fuqishme në Shqipëri ndërsa dha detaje për operacionin e përbashkët me autoritetet italiane ku u lëshuan 52 urdhërarreste, por nuk ishte fare bindës me arsyet që dha pse operacioni u la pas përfundimit të zgjedhjeve të 11 Majit kur ishin në dijeni se bëhet fjalë për një grup të fuqishëm me bazë në qytetin e Durrësit, njëri ndër më të rrezikshmit me pushtetin financiar që kanë, të ardhurat që sigurojnë nga aktiviteti kriminal, aftësia për të trafikuar sasi të mëdha kokainë nga vendet e Amerikës Latine dhe për ti shpërndarë në Evropë, kryesisht në Italisë e vende të tjera të Europës

“Është arritur ti jepet një goditje e fuqishme një prej grupeve kriminale më të fuqishme në Shqipëri për të cilën ka dyshime të forta se ishte i përfshirë në trafikun ndërkombëtar të drogave të forta dhe në pastrimin e parave.

Ky operacion i mbështetur nga hetimet e thelluara dhe shkëmbim efektiv informacioni ndërinstitucional është dëshmi e asaj që mund të arrihet kur institucionet e drejtësisë dhe strukturat e zbatimit të ligjit bashkëpunojnë, profesionalizëm dhe besim.

Shpreh mirënjohjen për prokurorët e SPAK, hetuesit e BKH, policinë e shtetit dhe partnerët italianë që sot ndodhen mes nesh dhe kanë dhënë kontribut të jashtëzakonshëm. Falenderim për Eurojust dhe Europol për mbështetjen e dhënë gjatë hetimeve të kryera,” tha Altin Dumani duke theksuar se vlerësimi që bënë se është ndër grupet më të rrezikshme ka shumë indikatorë.

“Grupi ynë i hetimit dhe kolegët italianë konkludojmë se është një nga grupet më të rrezikshme qoftë nga pushteti financiar që kanë, të ardhurat që sigurojnë nga aktiviteti kriminal, aftësia për të trafikuar sasi të mëdha kokainë nga vendet e Amerikës Latine dhe për ti shpërndarë në Evropë, kryesisht në Italisë e vende të tjera të Europës.

Qendra e grupit ishte qytetit i Durrësit dhe nëngrupeve, sa i takon emrave ne nuk japim gjeneralitete të personave që arrestohen edhe në komunikimet që bëjmë në njoftimet për shtyp nuk përmendim gjeneralite, s’kemi pse bëjmë përjashtim, qoftë për ata që masa është ekzekutuar dhe për ata që masa nuk është ekzekutuar.”

Duke pasur parasysh gjithë këto informacione për këtë grup krimial me pushtet të fuqishëm financiar, arsyetimi që Dumani pse ky operacion të realizohet pas zgjedhjeve ishte shumë absurd:

“Nuk ka të bëjë fare me zgjedhjet, ne veprojmë si skuadër edhe datën e dakordësojmë së bashku. Kushtëzohemi nga njëri tjetri në lidhje me dinamikën e hetimit, me marrjen e vendimit nga gjykata si dhe përgatitjen për ekzekutim të masave të sigurimit.

Është një operacion ndërkombëtar, nuk zhvillohet vetëm në Shqipëri, por edhe në vende të tjera, ku edhe tani që po flasim po bëhen përpjekje për të lokalizuar dhe kapur anëtarë të grupit. Kështu që ajo që është e sigurt është një datë e dakordësuar me policinë italiane dhe Eurojust.”

Ndërkohë nga pala italiane u fol me terma konkret lidhur me operacionin e përbashkët Shqipëri-Itali kundër trafikut ndërkombëtarë të drogës. Prokurori i Përgjithshëm Michele Carbone, tha sot se bëhet fjalë për një grup kriminal që kalon përtej kufijve të dy vendeve dhe që arrin deri në Amerikën e Jugut.

“Jam shumë i gëzuar, është hera e parë që vij në Tiranë. Është një krim ndërkombëtar mes lëndëve narkotike veçanërisht për lëndët narkotike, i kalon kufijtë ndërkombëtar dhe ka kontakte përtej Italisë dhe Shqipërisë. Flasim për kontakte në Evropën e Veriut, Amerikën e Jugut, Ballkan dhe vende të tjera.

Nëse rezultatet e djeshme u realizuan është sepse ka pasur një punë skuadre. Ka parë si aktorë jo vetëm policinë gjyqësore por edhe kolegët e policisë shqiptare. Rezultate të rëndësishme që mund të arrihen vetëm me anë të një loje skuadre. Falënderoj gjithë aktorët që bashkëpunuan,” tha Prokurori i Përgjithshëm Michele Carbone, ndërsa Prokurori Publik i Barit, Roberto Rossi, teksa dha detaje për operacionin “Ura” ku u lëshuan 52 urdhërarreste u shpreh se mafia shqiptare është tashmë një forcë e madhe ndërkombëtare, por shprehu bindjen se drejtësia shqiptare do të jetë në gjendje ta luftojë këtë kancer.

“Kemi punuar dhe punojmë prej 10 vitesh për arritjen e objektivave të përbashkëta për të luftuar krimin në Shqipëri apo në Itali. Jemi të ndërgjegjshëm që autoritetet e hetimit shqiptar, dhe në veçanti SPAK janë shumë të afta për kapjen e veprave bashkë me ne. Kjo forcë e përbashkët është e rëndësishme

Mafia shqiptare është një forcë ndërkombëtare shumë e madhe, por jemi të sigurt që populli shqiptar me anë të prokurorisë do të jetë në gjendje të luftojë këtë kancer,” tha Roberto Rossi duke përfunduar:

“Jemi të sinkronizuar bashkë për të arritur këtë objektiv. Ka një prezencë të jashtëzakonshme të policisë gjyqësore italiane dhe policisë gjyqtare shqiptarë që bashkë me në arrijnë objektivat e përbashkëta.”

Prokurori italian i cili ka ndjekur hetimet e megaoperacionit të zhvilluar në Itali dhe Shqipëri është ndalur tek fluksi i parave të përfituara nga trafiku i narkotikëve, të cilat transportoheshin nga Italia në Shqipëri përmes agjencive të autobusëve.

Ky aktivitet, sipas tij, është zbuluar falë shkëmbimit simultan të informacionit, përdorimit të GPS për lokalizim dhe vëzhgimit të koordinuar transkufitar, operacion hetimor gjatë të cilit janë identifikuar prova konkrete që tregojnë rrjedhën e parave nga vendet perëndimore drejt Shqipërisë.

“Sa i përket fluksit të parave kemi arritur bashkë të vëzhgojmë dhe të filmojmë kur personat nga Italia tia besonin paratë agjencitë e transportit me autobus që vinin në Shqipëri.

Edhe ky aktivitet për eliminimin e vështirësive në kalimin e kufijve është arritur me anë të shkëmbimit të informacionit simultane, ka lejuar të kryheshin në lokalizime me anë të GPS dhe shërbimeve të vëzhgimit transkufitare. Kemi arritur të shohim paratë që nga Italia shkonin në shoferët e autobusëve dhe më pas vinin në Shqipëri,” tha Prokurori italian duke përfunduar:

“Fluksi i parave është kuptuar nga të dhënat e marra nga chatet, në fotot e bërë në celular rezultatin përveç lëndëve narkotike dhe  paratë. Bashkë me pakot e parave kishte edhe disa letra të shkruara me dorë sa i takon kontabilitetit të grupit”.

Ndryshe, në mesin e rasteve të zbuluara janë pagesa “cash” prej mbi 500 mijë eurosh në Bari, transferta prej 500 mijë dollarësh drejt Amerikës Latine, parapagim për një ngarkesë me 500 kg kokainë nga Guayaquil, Ekuador ndërsa janë sekuestruar në Shqipëri restorante luksoze, një rrjet televiziv, një agjenci imobiliare dhe kompani ndërtimi ndërkohë në Itali, 9 apartamente, 4 kompani, 7 llogari bankare dhe
3 automjete.