“Pasaporta e artë”, Berisha: Kanal i zi për të larë narko-eurot e trafikantëve!

“Narko-trafikant dhe kriminel të të gjithë rajonit, Evropës dhe botës bashkohuni në Shqipëri!” Kjo është thirrja e Edi Ramës që bënë përmes “Pasaportës së artë”, tha sot Kryetari i Partisë Demokratike, Sali Berisha, duke e cilësuar këtë nismë të Kryeministrit si një kanal të zi për të larë narko-eurot e trafikantëve të pashpirtë në Shqipëri.

Dhe jo vetëm kaq! Me “Pasaportën e artë” Edi Rama kërkon të bllokojë procesin e negociatave me BE!

Sot në konferencën e përjavshme Berisha foli edhe për përgjakjen e vendit nga krimi ndërsa Edi Rama inkurajon bandat me thirrjet e tij për vrasje, e për Portin e ri të Durrësit ai u zotua se miliardat të cilat mendon ti vjedhë Kryeministri, nuk do ti gëzojë!

“Pasaporta e artë e Edi Ramës është thjesht një thirrje: “Narko-trafikant dhe kriminel të të gjithë rajonit, Evropës dhe botës bashkohuni në Shqipëri”. PD deklaron se pas nisjes për legalizimin e kanabisit, ligjin për amnistinë fiskale, legalizimin e parave të krimit që hyjnë nga jashtë, pasaporta e artë është mekanizmi i tretë e i fundit i trinomit të shndërrimit të Shqipërisë në parajsën tokësore të drogës trafiqeve dhe krimit rajonal evropian dhe botëror.

Pasaporta e artë, në vendet ku shteti ligjor funksionon është një mundësi e përdorur nga ato qeveri dhe vende për të thithur investime të huaja. Kurse pasaporta e artë në narko-shtetin e parë dhe të vetëm në Evropë, Shqipëri, është kanal i zi për të larë narko-eurot e trafikantëve të pashpirtë të rajonit, Evropës e botës në Shqipëri,” tha Sali Berisha duke e konsideruar nismën e Edi Ramës “Pasaportën e artë” një kanal i zi për paranë toksike të bosëve të drogës dhe krimit, para e cila me kullat monumente nacionaliste korruptive si i ka quajtur shtypi ndërkombëtar në Tiranë po shkatërron pamjen, urbanistikën trafikun e mjedisin e saj”

Me këtë rast, Kryetari i PD përshëndeti qëndrimin e Komisionit Europian i cili është shprehur në mënyrë kategorike kundër këtyre praktikave.

“Dënoj me ashpërsinë më të madhe pasaportën e artë të Edi Ramës, si një thirrje për trafikantët, kriminelët, por edhe terroristët nga mbarë bota, paguani që të mblidheni në Shqipëri. Paralajmëroj Edi Ramën se këto praktika me sa duket kanë edhe një qëllim të dytë politik, bllokimin e procesit të negociatave me BE. Është e vërtetë që konferenca e parë është mbajtur, sikundër që negociatat nuk janë hapur në kuptimin që procesi do rifillojë pas disa shqyrtimeve që do të bëhen gjatë këtyre muajve në një konferencë të dytë. Ka një mënyrë për ta shtyrë në kalenda konferencën e dytë, është kjo që bën Edi Rama me pasaportën e artë dhe dhënien me koncesion të shtetësisë.

E paralajmëroj në mënyrë serioze se këto praktika do të kundërshtohen me të gjithë potencialin që ka opozita. Sikundër, paralajmëroj çdo person, aplikimi mbi bazën e kësaj praktike nuk do të njihet nga opozita shqiptare. Ndaj të mos bien pre e një skeme të madhe mashtrimi. Ky është qëndrimi i PD ndaj këtij procesi në të cilën Edi Rama kërkon të forcojë pushtetin e tij nëpërmjet krimit, drogës dhe mafies.”

Në këtë konferencë të përjavshme, lideri i opozitës denoncoi edhe aferën që e cilësoi më skndaloze në historinë e këtij vendi, Portin e Durrësit.

“Janë që të gjitha një abuzim i madh, një vjedhje e madhe. Në një takim para kësaj unë kam shprehur se afera e Portit të Durrësit është një aferë që vetëm toka është mbi 3 miliardë euro, pa llogaritur sipërfaqen e ndërtimit mbi të. Edi Rama e ka ndërmarrë kryekëput për xhepat e tij, një aferë për të cilën nuk është pyetur asnjë qytetar i Durrësit, janë shkelur rregullat kombëtare dhe ndërkombëtare për tenderat. Një aferë që nuk do të mund të realizohet, një aferë që gjobit Shqipërinë me ndërtimin ndoshta 2 miliardë euro të një porti të ri se do zoti Rama me enturazhin e tij të ndërtojë Dubain e vet.

Pra, ajo është afera më skandaloze në historinë e këtij vendi dhe ne po merremi, po e ndjekim çdo ditë, por mund t’ju rikujtoj këtu se ndoshta për Velierën famoze e filluar në 2016 dhe s’po përfundon, Edi Rama bëri një takim dhe paraqiti një projekt 3D, ju s’keni parë kund takim publik për Portin e Durrësit,” tha Berisha duke siguruar qytetarët se ndonëse fitimi tek Veliera fitimi është disa milionë e te Porti i Durrësit është disa miliarda, ai nuk do të mund ta gëzojë.

“Po afron sezoni dhe populli do ‘flasë’ me të Bordet, si mekanizma për të rritur çmimet për llogari të qeverisë, janë që të gjitha institucione antikushtetuese, antiligjore që po mbajnë çmimet e larta, vetëm e vetëm për të plaçkitur dhe varfëruar qytetarët. Në rast se një litër vaj kushtonte më parë 1300 lekë dhe kushton sot rreth 4 mijë lekë, me çmimin e mëparshëm paguhej për një litër 200 lekë TVSH, me çmimin aktual paguhet 800 lekë TVSH, për qeverinë, 20% shumëzuar për 4,” tha Kryetari i PD duke folur për mekanizmin pse mbahen çmimet e larta dhe si Edi Rama vjedh qytetarët.

Nafta ka zbritur nën vlerat e 6 muajve më parë, para luftës. Ajo shitet me 0.9 dollarë në SHBA, shitet me 1 dollar në Kanada, me 1500-1600 lekë në Malin e Zi, rritet në Shqipëri në mënyrën me cinike dje dhe bëhet 226 apo 230 lekë. E gjitha kjo është një mekanizëm për të varfëruar, për të intimiduar dhe vjedhur qytetarët shqiptarë nëpërmjet naftës, djathit, qumështit, vezëve, bukës dhe ushqimeve bazë. Prandaj dhe po afron sezoni dhe populli do flasë me Edi Ramën. Njerëzit nuk mund t’i asgjësosh në këtë mënyrë. Ata po varfërohen. Ky në vend që t’u kthejë rreth 400 milionë që u ka grabitur me çmime, merr dhe ua jep klientelës së tij,” tha Kryetari i PD, Sali Berisha, duke u zotuar në përgjysmimin e barrës fiskale të naftës me ardhjen e Partisë Demokratike në pushtet.

“Nafta, do të përgjysmohet barra fiskale dhe çmimi do të zbresë nën nivelin mesatar të vendeve. Do të subvencionohen 100% biletat e udhëtimit.”