Pasaportat më të fuqishme në botë, Shqipëria renditet e 53-ta, Kosova e 104-ta

Tre pasaportat më të fuqishme në botë janë aziatike dhe i ofrojnë qytetarëve liri më të madhe globale të udhëtimit, tregon raporti i fundit i kompanisë londineze këshilluese mbi shtetësinë dhe qëndrimin, Henley & Partners.

Studimi i tyre, raporton CNN, fuqinë e pasaportës e vlerëson sipas numrit të vendeve që qytetarët mund të udhëtojnë pa viza.

Japonia ka kaluar e para duke i ofruar qytetarëve të saj udhëtim pa viza në 193 shtete, nga 192 sa ofrojnë dy shtetet tjera në renditje, Singapori dhe Korea e Jugut ndërsa tregjet e udhëtimeve në Europë dhe Amerikën e Veriut janë rikuperuar me rreth 60% në krahasim me nivelevet e mëparshme.

Europa sërish dominon

Pas tre vendeve aziatike, një numër i madh vendesh europiane kryesojnë top listën 10.

Gjermania dhe Spanja kanë akses në 190 destinacione, të ndjekura nga Finlanda, Italia dhe Luksemburgu me 189.

Në vend të pestë me 188 destinacione renditen Austria, Danimarka, Holanda dhe Suedia, ndërsa Franca, Irlanda, Portugalia dhe Mbretëria e Bashkuar janë në vendin e 6-të.(187)

Zelanda e Re dhe Shtetet e Bashkuara renditen në vendin shtatë, krahas Belgjikës, Norvegjisë dhe Zvicrës.

Për shkak të pushtimit të Ukrainës, mbajtësit e pasaportave ruse janë më të shkëputur nga pjesa tjetër e botës më shumë se kurrë më parë.

Indeksi nuk merr parasysh kufizimet e përkohshme ose mbylljet e hapësirës ajrore, kështu që pasaporta ruse aktualisht është në vendin e 50-të në indeks, me akses hyrje në 119 destinacione, por në realitet qytetarët rusë janë efektivisht të ndaluara për të hyrë në shumë prej atyre destinacioneve.

Kina renditet e 67-ta me akses në 80 vende, ndërsa mbajtësit e pasaportave indiane tani kanë liri të ngjashme udhëtimi me atë që gëzonin para pandemisë, thotë raporti, me akses të pakufizuar në 57 destinacione në mbarë botën (krahasuar vetëm 23 destinacione në 2020).

Pasaporta e Afganistanit renditet si më e dobëta, ku mbajtësit e saj mund të udhëtojnë në vetëm 27 vende.

Kërkesa ndërkombëtare e pasagjerëve për udhëtime ajrore në rajonin e Azi-Paqësorit është ende më pak se një e pesta e niveleve të para covidit, sipas statistikave më të fundit nga Shoqata Ndërkombëtare e Transportit Ajror, IATA.

Shqipëria, Kosova dhe Rajoni

Sipas indeksit Henley&Passport, raporton CNN, Shqipëria renditet në vendin e 53, ku poseduesit e pasaportës shqiptare mund të udhëtojnë në 115 shtete ndërsa Kosova në vendin e 104 dhe mund të udhëtojnë në 41 shtete.

Serbia në vendin e 38 me 136 shtete, Maqedonia e Veriut në vendin e 45 me 125 shtete, Mali i Zi në vendin e 46 me 124 shtete dhe Bosnje Hercegovina në vendin e 51 me 118 shtete.

Pasaportat më të mira në korrik 2022 janë:

1. Japonia (193 destinacione)
2. Singapori, Koreja e Jugut (192 destinacione)
3. Gjermania, Spanja (190 destinacione)
4. Finlanda, Italia, Luksemburgu (189 destinacione)
5. Austria, Danimarka, Holanda, Suedia (188 destinacione)
6. Francë, Irlandë, Portugali, Mbretëria e Bashkuar (187 destinacione)
7. Belgjikë, Zelanda e Re, Norvegjia, Zvicra, Shtetet e Bashkuara (186 destinacione)
8. Australi, Kanada, Republika Çeke, Greqia, Malta (185 destinacione)
9. Hungaria (183 destinacione)
10. Lituania, Polonia, Sllovakia (182 destinacione).

Pasaportat më të këqija në korrik 2022

105. Koreja e Veriut (40 destinacione)
106. Nepal, territori palestinez (38 destinacione)
107. Somali (35 destinacione)
108. Jemeni (34 destinacione)
109. Pakistan (32 destinacione)
110. Siri (30 destinacione)
111. Irak (29 destinacione)
112. Afganistan (27 destinacione).

Ndryshe, indeksi Henley&Passport është krijuar nga kompanitë finansiare për renditjen e pasaportave globale nga ajo që afrojnë qytetarëve. Mbulon 227 destinacione për udhëtim. Përditësohet në kohë reale për gjatë vitit, kur ndryshimet e regjimit të vizave të jenë fuqi.