Pasi dhunoi demokratët më 8 Janar, Basha nga Fieri: Ne djall shkoftë e shkuara!

Sot kryetari i shkarkuar i Partisë Demokratike, Lulzim Basha, e arsyetoi vendimin e tij për ta komanduar Agron Kapllanaj nga Mallakastra kryetar të PD Dega Fier, pasi u pa se nuk ka as edhe një demokrat fierak që do ta priste në takimin e sotëm, nëse përjashtojmë ndonjë pjesëtarë të forcave speciale që mund të jetë nga ky qytet dhe nuk është kapur nga radari i Saimir Tahirit.

Dhe, pasi u nda me veprimin e FNSH me 8 Janar, Lulzim Basha i ftoi edhe në Fier nëse rastësisht i del në rrugë ndonjë demokratë. Kështu dhe ndodhi, ata demokratë që pësuan nga paramiltarët e Lulzim Bashës dhe policët e Edi Ramës sot dolën për të shprehur pakënqësinë për prezencën e Bashës në këtë qytet.

Por kjo nuk e pengoi Lulzim Bashën të realizoi takimin me një sallë të përfaqësuar nga bashkëqeverisja e cila më 8 Janar e dha provimin se si duhet trajtuar demokratët. Ndonëse me banditë në krah dhe atë që vazhdimisht i jep urdhra në telefon dhe qeveris shtetin, sot Basha nga Fieri foli për vettigun e politikanëve do t’i jep fund 3 dinozarëve të tranzicionit, për të cilën ide mori duartroktije nga të pranishmit kur tha se ky do të jetë një ndër vendimet e para që do të merret kur PD të vijë në pushtet.

“Ne do ta sjellim ndryshimin miqtë e mi, ndryshimin e vjedhur nga masakra zgjedhore e 25 prillit, do ta sjellim. Ne sot jemi më të qartë se ç’ishim me 26 apo 27 prill se pse u ndal ndryshimi. Ne sot jemi shumë më të qartë sepse edhe miqtë dhe aleatët tanë e kanë cilësuar qeverinë e Edi Ramës më të korruptuarin në Ballkan. Nuk ishin as zë lartë kur masakra zgjedhore e ndali ndryshimin sepse me të drejtë ngjarjet provuan që ndryshimi nuk do të ishte ai që duan dhe meritojnë shqiptarët ku brenda familjes tonë politike dhe brenda koalicionit tonë kishim akoma njerëz, prania e të cilëve, aspiratat të cilëve ishin jo në përputhje, por në kundërshtim me aspiratat e naftëtarëve të Ballshit, e fermerëve të Divjakës, e studentëve të Fierit, e intelektualëve të Lushnjës e grave dhe burrave të qarkut të Fierit e mbarë Shqipërisë.

Përkundrazi, kishin frikë se Trekëndëshi do ta përdorte 25 prillin prapë se prapë për ta mbajtur brenda kafazit shpresën e shqiptarëve për ndryshim. Do ta përdorte për të vazhduar kalvarin e vjetër i cili as nuk nisi as nuk përfundoi, por u bë akoma më keq me Edi Ramën. Pushteti i takon qytetarëve dhe do jetë i tyre. Kemi pasur 9 orë mbledhje. Në mbledhjen e Këshillit Kombëtar kemi qëndruar aq. E di që prisni të flas, por skam pse harxhoj kohën tuaj. S’kemi pse flasim për të shkuarën. Ne djall shkoftë e shkuara, të ecim para drejt së ardhmes. Të hapim një faqe që duhet të ishte hapur dekada më parë, atë të pluralizmit të vërtetë. Shqipëria dhe politika e shqiptarëve nuk i takojnë më 3 dinozarëve të tranzicionit. Dhe për këtë duhet të bëjmë sa më parë vettingun e politikanëve. Secili prej brinjëve të trëkëndëshit të Bermudës ka arsyet e veta se pse nuk e do vettingun. Kjo do ta ndajë thashethemet nga e vërteta,” tha Lulzim Basha i cili e ka bërë të qartë se kush është pa ardhë në pushtet duke e demonstruar më 8 Janar se çfarë është në gjendje t’ju bëjë demokratëve për pushtet dhe karrige.

Dhe, atyre që administrojnë këtë shtet dhe me të cilët bashkëpunon edhe kundër demokratëve, Basha tha në Fier se janë të korruptuar. Se kujt i tha nuk dihet sepse ata që kishte në krah kishin përfituar nga ata të korruptuar që qeverisin këtë shtet ashtu sikur se shumica e atyre që ishin në sallë.

“Ky shtet nuk është i korruptuar, por i të korruptuarve. Ëndrra për një demokraci të vërtetë, për një Shqipëri si Europa, ku secili shpalos nga vetitë e veta, ka ngelur i parealizuar. Hapat më domethënës mbajnë vulën e demokratëve. Djersa dhe sakrifica e shqiptarëve që sakrifikuan jo për veten e tyre, por për shqiptarët. Në këtë betejë kemi sakrifikuar shumë. Demokratët na kanë dhënë shumë besim. Askush nuk është në borxh me askënd prej nesh. Dhuna nuk është mjet i demokratëve. Me dhunë as nuk shantazhohen dhe as nuk detyrohen demokratët dhe as institucionet e demokratëve. As kryetari, as këshilli, as vetë degët. Nuk i përgjigjet dhunës asnjë demokrat. Përgjigja jonë ndaj dhunës së qeverisë ka qenë dhe do të jetë e fuqishme, por brenda shtëpisë sonë, askush s’mund t’i vendoset tjetrit,” tha Lulzim Basha me sinqeritetin më të madh duke shprehur pretendimin e ekskluzivitetit për dhunën ndaj demokratëve duke mos i lënë vend qeverisë.

Sot, ndryshe nga 8 Janari, Lulzim Basha e ka të qartë se me dhunë nuk mund të detyrohen demokratët apo institucionet e demokratëve, ndërsa akuzat për Sali Berishën sot nuk pinë ujë meqë u pa qartë në ballkonin e Zyrës së tij se kush është në gjendje të vras për karrige, qofshin ata edhe demokratë.

“Më 8 janar në kundërshtim me thirrjet tona u kalua një vijë e kuqe që na ndan dhe që duhet të na ndajë një herë e përgjithmonë. Me dhunë as nuk mund të shantazhohen, as zaptohen dhe as detyrohen demokratët apo institucionet e demokratëve nga Berisha dhe njerëzit e tij. Ata demokratë u përdorën si fasadë për të mbuluar aktin e turpshëm të dhunës. Dua t’ju ftoj nga Fieri të gjithë demokratëve kudo ku janë, dhe do të shkojë ti takoj nga jugu në veri; le ta lëmë të shkuarën pas. Do të zgjedhim të ardhmen. Mos u dorëzoni para një pakice, kalorësve që kanë marrë gjithçka dhe që duan të jenë në karriget e përjetshme. Për ta janë gati që të ndryshojë kushtetuta. Ata janë pakica absolute. Sado ta ngrejë zërin e tyre paraja e shumicës, ata janë prapë pakica. Shumica e shqiptarëve duan ndryshimin dhe meritojnë ta kenë. Është misioni ynë të sjellim ndryshimin,” tha Lulzim Basha i cili këtë ndryshim e ka marrë me gjithë zemër revolucionare duke e shoqëruar me dhjetëra pjesëtarë të forcave speciale të policisë së Edi Ramës që e ruajtën me zell Bashë nga demokratët edhe në qytetin e Fierit.