Pasi hyri në Kosovë, autobusi me 50 pelegrinë serbë kthehet mbrapsht nga Mitrovica! Ja arsyeja…

Autobusi me 50 pelegrinë serbë janë lejuar sot të futen në Kosovë, por pas disa orësh janë kthyer mbrapsht nga Mitrovica kur u kuptua itinerari i tyre i lëvizjes.

Beogradi zyrtar ka reaguar ashpër përmes Drejtorit të Zyrës për Kosovën pranë Qeverisë së Serbisë, Petar Petkoviç, pasi autobusi me pelegrinë u kthye në vendkalimin Jarinje nga ishin futur, duke theksuar se ky është një turp për liderët shqiptarë në Prishtinë që urdhërojnë ndalesa të tilla.

“Dhe, tregues për bashkësinë ndërkombëtare se si trajtohen serbët, kur as një grup i besimtarëve nuk mund të vizitojnë varrezat e familjarëve të tyre. Për çfarë normalizimi të marrëdhënieve ne flasim sot, kur serbëve në Kosovë u mohohen të drejtat themelore të njeriut,” tha Pekoviç për televizionin publik të Serbisë RTS, duke bërë politikë me të vdekur dhe varreza, si shefi i tij Aleksandar Vuçiç.

Ndryshe nga sa tha Petkoviç, autobusi me 50 pelegrinë serbë në vendkalimin Jarinje kishin deklaruar se po shkojnë në Mitrovicë dhe u lejuan të futen në Kosovë; Por, në Mitrovicë, ata i thanë policisë se po shkojnë të vizitojnë varrezat në Deçan, Prizren, Hoçë të Madhe dhe Mushtishtë dhe se kishin marrë lejen përkatëse. Pasi u konfirmua se nuk kishin lejen nga organet kompetente të Kosovës, ata nuk u lejuan të vazhdojnë rrugën dhe u kthyen në vendkalimin kufitar nga kishin hyrë.