Pasi i mbylli derën, Edi Rama shkarkon kreun e SHISH, Helidon Bendo!
Një javë pasi Kryetari i Partisë Demokratike, Sali Berisha, bëri të ditur se shefit të SHISH, Helidon Bendo, pas kthimit nga shkollimi në SHBA nuk po i hapet dera e Shërbimit Informativ me urdhër të Kryeministrit, sot Edi Rama ka shkarkuar Bendon ndonëse në njoftim thuhet se për arsye studimi Bendo ka dhënë dorëhejqe.
“Me Helidon Bendon, Drejtorin e Shërbimit Informativ të Shtetit, i cili për arsye të vazhdimit të studimeve pasuniversitare në Kolegjin e Studimeve Ndërkombëtare e të Sigurisë, pranë Universitetit Kombëtar të Mbrojtjes në Shtetet e Bashkuara, ka dorëzuar dorëheqjen,” tha Kryeministri Edi Rama në njoftimin e tij duke shtuar se ai do të angazhohet në vijim si këshilltar i kryeministrit për reformën e institucioneve të sigurisë.
Pas këtij vjen njoftimi dhe Dekreti i Presidentit të Republikës që e liron nga detyra:
D E K R E T
PËR LIRIMIN NGA DETYRA TË DREJTORIT TË SHËRBIMIT INFORMATIV TË SHTETIT
Në mbështetje të nenit 93 të Kushtetutës, si dhe të nenit 5, paragrafit 2, të ligjit nr. 8391, datë 28.10.1998, “Për Shërbimin Informativ Kombëtar”, të ndryshuar, me propozim të Kryeministrit,
D E K R E T O J :
Zoti Helidon Bendo, lirohet nga detyra e drejtorit të Shërbimit Informativ të Shtetit.
Dekret nr. 13887
Tiranë, më 23.12.2022 BAJRAM BEGAJ
Ndryshe, akt mafioz dhe të pashembullt, e ka konsideruar sot Kryetari i Partisë Demokratike, Sali Berisha, mbylljen e dyerve të shërbimit që iu bë Shefit të Shërbimit Informativ Kombëtar, Helidon Bendo, të cilit nuk i lejohet të marrë as detyrën pas kthimit nga shkollimi në SHBA!
“Nëse Edi Rama e konsideron atë spiun të amerikanëve, francezëve apo gjermanëve, ai duhet të bëjë transparencë para shqiptarëve,” tha Kryetari i Partisë Demokratike, Sali Berisha, në konferencën e përjavshme të 16 dhjetorit.
Dhe, pavarësisht se çfarë thotë Kryeministri Edi Rama, shkarkim ose dorëheqje, ai të mërkurën në një takim me drejtues të SHISH ka vendos të emëroj ish-këshilltarin e tij për çështjet e sigurisë, Olian Kanushi, në krye të Shërbimit Informativ. Pra, pa dhënë dorëheqje Helidon Bendo!
