Pasi Kosova hoqi kufizimin ndaj mallrave serbe, BE shpreson në zhbllokimin e CEFTA-s

Bashkimi Evropian, BE, e ka cilësuar sot si hap të duhur drejt zhbllokimit të vendimmarrjes në CEFTA vendimin e Kosovës për heqjen e kufizimit ndaj importit të mallrave nga Serbia një ditë më parë.

Qeveria e kryeministrit Albin Kurti vendosi dje ta heqë kufizimin ndaj mallrave nga Serbia në pikën kufitare në Merdare, ndërsa të martën ky pikëkalim u hap për mallrat serbe.

BE e ka parë si lajm të mirë vendimin e Qeverisë së Kosovës me shpresë se, në këtë mënyrë, është hapur rruga për sukses të samitit të Procesit të Berlinit, i cili zhvillohet javën e ardhshme në Gjermani.

Burime diplomatike në BE thanë për RFE se Gjermania ka punuar për ta zgjidhur çështjen e asaj bllokade, ndërsa dje, Gjermania i ka njoftuar dhe vendet e tjera për ecurinë e bisedimeve me Kosovën dhe me Serbinë.

Ato thanë se akoma nuk i dinë të gjitha hollësitë nga bisedimet rreth CEFTA-s sepse, përveç heqjes së kufizimit ndaj mallrave nga Serbia nga ana e Kosovës, duhet gjetur edhe modalitetin për pjesëmarrjen e Kosovës dhe një zgjidhje me të cilat do të pajtoheshin të gjitha palët.

Kosova është anëtare e CEFTA-s prej vitit 2007, por është e përfaqësuar përmes misionit të OKB-së në vend – UNMIK.

Kryeministri i Kosovës, Albin Kurti, tha dje pas vendimit se pret që në takimin e radhës, Kosova do të përfaqësohet me emrin e vet.

Ndërkohë, zëdhënësi i BE-së, Peter Stano, ka rikujtuar rëndësinë që CEFTA-s ka për tregun rajonal dhe ka përsëritur mbështetjen e fuqishme të bllokut për këtë.

“BE-ja mbështet tregtinë e lirë të mallrave në gjithë Ballkanin Perëndimor, në përputhje me rregullat e CEFTA-s. Kjo është kyçe për funksionimin e tregut të përbashkët rajonal dhe pjesë përbërëse e planit për rritje në rajon, dhe të dyja këto sjellin përfitime të dukshme për qytetarët në të gjithë rajonit“, tha Stano./RFE/