Pasi prishën zgjedhjet, Meta-Rama fillojnë cirkun “Shkarkimi i President”!

Pasi prishën fillimisht fushatën zgjedhore dhe i shkaktuan një dëm të madh opozitës dhe vendit në tërësi, dyshja kriminale Meta-Rama arriti të devijoj vullnetin e popullit më 25 Prill, dhe tani me daljen e rezultatit zgjedhor dhe pranimit nga faktorët kryesor SHBA-BE, fillon javën e parë të Majit me cirkun “Shkarkimi i Presidentit” për të spostuar vëmendjen nga masakra zgjedhore.

Pasi ka mbledhur 47 firma për nismën e shkarkimit të Presidentit nga PS, Kryetari i Grupit Parlamentar të Partisë Socialiste, Taulant Balla, sot ka prezantuar nismën në mënyë që të futet në kalendarin e punimeve të Parlamentit.

“Besoj që jeni vënë në dijeni që prej ditës së premte është institucionalizuar kërkesa e më shumë se ¼ e anëtarëve të Kuvendit, mos gaboj rreth 50 deputetë, të cilët kanë depozituar kërkesën drejtuar kreut të Kuvendit për fillimin e procedurës së shkarkimit të Presidentit, se ky i fundit para dhe gjatë fushatës zgjedhore ka kryer veprime që bien në kundërshtim me Kushtetutën. Duke u nisur dhe nga një rezolutë e mëparshme e Kuvendit që i kërkon presidentit të rikthehet në binarët e përcaktuara nga Kushtetuta, lidhur me ushtrimin e detyrës nga ana e tij, gjë që nuk ka ndodhur, pasi ai ka vazhduar edhe pas kësaj rezolute të kryejë veprime kundër ligjit. Në këtë vështrim, Kuvendi do të shprehet me vendim në ditët në vijim, lidhur me këtë kërkesë, që plotëson të gjitha kushtet e nevojshme për t’u shqyrtuar nga Kuvendi.

Kjo kërkesë nga ana e kryetarit të Kuvendit do t’i kalojë për shqyrtim Komisionit të Ligjeve, që brenda një afati duhet të shprehet nëse kërkesa i plotëson kriteret ligjore e formale e m pas do duhet të ngrihet Komisioni hetimor, për të vërtetuar nëse qëndrojnë dyshimet e ngritura. Besoj se Kuvendi aktual e ka sovranitetin e duhur për të ushtruar mandatin e tij deri më 8 korrik,” tha Kryetari i Grupit Parlamentar të PS, Taulant Balla.

Për dallim nga hera e parë e iniciativës për shkarkimin e Presidentit të Republikës, ku vëmendja nga kriza u spostua tek Komisioni Hetimor nëse do ta shkarkoj apo jo Presidentin, opinioni publik nuk ndjek më me interes lojët Rama-Meta që shfaqen në momente krizash, siç është kjo aktuale, me masakrën zgjedhore.

Dëmi që i ka shkaktuar Ilir Meta, Partisë Demokratike, nuk ka hetim dhe as shkarkim që mund ta kthej në normalitet dhe pak rëndësi ka nëse ky abuzues i shqiponjave dhe popullit demokrat përfundon në rrugë ose Kryeministri si Këshilltar i Edi Ramës. Fryma antiamerikane që nxiti ky ordiner i Internacionales Socialiste vetëm do të kujtohet në analet e PD, kur vetëm disa minuta pas përmbylljes së fushatës doli si njëri nga liderët e vetëshpallur të opozitës dhe sulmoi Ambasadoren e SHBA, Yuri Kim në prag të zgjedhjeve. Dëmet ishin të pallogaritshme meqë pas disa minutave filloi heshtja zgjedhore dhe liderët opozitarë nuk kishin kohë të sqaronin nëse kishin ose jo mbështetjen amerikane, gjithsesi Ilir Meta nuk “dështoi”!

Hapat që do të ndiqen tashmë për këtë nismë janë Komisioni Hetimor Parlamentar, seanca dëgjimore komike me Ilir Metën, dhe raporti i Këtij komisioni që i kalon Parlamentit dhe më pas 94 votat që duhen për të vendosur për shkarkimin ose jo të Metës si President.

Pas përfundimit të këtij cirku, që pritet të shoqërohet nga ana tjetër me konstestimin e zgjedhjeve nga opozita, ligjërisht është Gjykata Kushtetuese e cila merr vendimin për shkarkimin e Presidentit të Republikës, që praktikisht është e pamundur para skadimit të mandatit të Presidentit!

Ndryshe, Konferenca e Kryetarëve, pasi ka vendosur zhvillimin e seancave plenare në datat 4 maj, 6 maj, 13 maj dhe 20 maj 2021 ka miratuar programin e punës së Parlamentit për periudhën 10 maj-9 korrik 2021 dhe kalendarin e punimeve për periudhën 4-21 maj 2021.