Pasi SHBA rifilloi ndihmat për Kievin, G7 diskuton mbi Ukrainën

Ministrat e Jashtëm të shtatë vendeve më të zhvilluara të botës, G7, do të mblidhen për një takim disa ditor në Kanada. Diskutimet do të jenë të të përqëndruara në mbështetjen për Ukrainën në betejën e saj kundër agresionit tre vjeçar rus.

Bisedimet pasojnë vendimin e Shteteve të Bashkuara për të rifilluar ndihmat ushtarake dhe ato të zbulimit për Ukrainën, pasi zyrtarë të lartë nga të dy vendet u takuan në Jeddah të Arabisë Saudite.

Pas gati tetë orësh bisedimesh, Ukraina njoftoi të martën gatishmërinë e saj për të pranuar një propozim të Shteteve të Bashkuara për “një armëpushim të menjëhershëm 30-ditor” në luftën me Rusinë. Propozimi duhet të pranohet edhe nga Kremlini.

Kancelari gjerman Olaf Scholz përshëndeti propozimin duke thënë sot përmes rrjetit social X se ai është një hap i rëndësishëm dhe korrekt drejt një paqeje të drejtë për Ukrainën.

“Ne qëndrojmë me Ukrainën dhe Shtetet e Bashkuara dhe mirëpresim propozimet nga takimi në Xhedah. Tani varet nga Putini,” shprehet Kancelari Scholz.

Kremlini tha sot se pret të mësojë nga Washingtoni hollësitë e propozimit të armëpushimit, ndërsa zyrtarë të lartë rusë thanë në kushte anonimiteti se marrëveshja duhet të marrë parasysh përparimet që ka bërë Rusia në fushën e betejës.

Ministria e Jashtme e Rusisë tha se negociatat me zyrtarët amerikanë mund të zhvillohen këtë javë.

Sekretari amerikan i Shtetit Marco Rubio u tha gazetarëve mbrëmë se Ukraina ka ndërmarrë një hap konkret drejt përfundimit të luftës.

“Tani ne do t’ia dërgojmë këtë propozim rusëve. Ne shpresojmë që ata të thonë po, që do t’i thonë po paqes. Tani topi është në fushën e tyre,” tha Rubio.

Këshilltari për sigurinë kombëtare, Mike Waltz, i cili ishte pjesë e delegacionit amerikan në Jeddah, tha se do të fliste me homologun e tij rus në ditët në vijim.

Nesër, Sekretari i Përgjithshëm i NATO-s Mark Rutte do të vizitojë Shtëpinë e Bardhë. Të gjitha këto diskutime janë pjesë e përpjekjeve për avancimin e procesit të paqes.

Presidenti ukrainas Volodymyr Zelenskyy nuk mori pjesë në bisedimet SHBA-Ukrainë, por gjatë fjalimit që e publikoi të martën në mbrëmje ai tha se plani i armëpushimit ishte një “propozim pozitiv”./VOA/