Pasi shkatërroi Opozitën dhe Zgjedhjet, Meta ul kokën: Të gjithë të reflektojnë!

Pas paralajmërimit të Presidentit të Republikës, Ilir Meta, për daljen publike në orën 14:00, kishte ende nga ata që i besuanin këtij mashtruesi që ishte shprehur se do të jap dorëheqje nëse fiton Edi Rama.

Kur fituesi tashmë dihet, njeriu i cili fillimisht shkatërroi opozitën, dëmtoi rëndë Partinë Demokratike duke dalë si aleatë i saj kundër partnerit tonë strategjik, SHBA, duke vënë në pikëpyetje pritshmëritë e qytetarëve me daljet publike në krah të kandidatëve të PD, me një aksion politik që shkatërroi edhe zgjedhjet, sot Ilir Meta doli dhe tha se tani është koha për të përmbyllur me qetësi dhe në respekt të ligjit procesin zgjedhor dhe më pas të gjithë të reflektojnë deri në shtator, kur krijohen institucionet e reja, që burojnë nga vota e 25 Prillit.

Pas kësaj dalje të shëmtuar publike, pritet reagimi i partnerit të tij të mashtrimit, Edi Rama, nëse do ta shkarkoj nga posti i Presidentit të Republikës, siç është zotuar, pavarësisht nga skenaret e proklamuar që përzgjedh.

Mesazhi:

“Të dashur qytetarë të Republikës,

Më 25 Prill, ju e shprehët me votë vullnetin për të zgjedhur përfaqësuesit tuaj në Kuvendin e Shqipërisë.
Në këto momente është tepër e rëndësishme, që ky proces të përmbyllet qetësisht dhe që çdo votë, nga Vermoshi në Konispol, të numërohet dhe të administrohet sipas ligjit.

Deri në shpalljen e rezultatit përfundimtar, partitë politike dhe përfaqësuesit e tyre duhet të dëshmojnë maturi dhe qetësi.

Sfida ime madhore, sidomos këto dy vitet e fundit, ka qenë që Sovrani të shprehë i lirë vullnetin e tij dhe që Shqipëria të rikthehet në shinat e Kushtetutës, të parlamentarizmit dhe në normalitet politik.

Edhe pse i vetëm përballë të gjithë institucioneve të kapura, ja arrita, që 25 Prilli të ishte një ditë e qetë, paqësore, pa skena dhune dhe me pjesëmarrjen tuaj masive për të ushtruar të drejtën e votës.

Ndonëse dukej një sfidë e pamundur jam i lumtur, që 25 Prilli mund t’i shërbejë demokracisë dhe stabilitetit të vendit.

Tani është koha për të përmbyllur me qetësi dhe në respekt të ligjit procesin zgjedhor dhe më pas të gjithë të reflektojnë deri në shtator, kur krijohen institucionet e reja, që burojnë nga vota e 25 Prillit. “