Pasi u dorëzua në Hagë, bastiset shtëpia e Thaçit
Pasi u dorëzua në Gjykatën Specialenë Hagë, sot u bastis shtëpia e ish-presidentit të Kosovës, Hashim Thaçi, për të cilin avokati i tij, Dastid Pallaska.
“Bastisja është kryer. Sa u përket qëllimeve të bastisjes, mund të them se ishin jashtëzakonisht të përgjithshme. Rrjedhimisht, nuk dukej se kishte ndodnjë shënjestrim të duhur të bastisjes, që është parakusht procedurial për urdhrimin e saj,” tha Pallaska duke shtuar:
“Kjo bastisje sugjeron se aktakuza kundër Thaçit, ashtu siç është konfirmuar, mbetet një shënjestër në lëvizje, përkatësisht duket se prokuroria ende kërkon prova për ta mbështetur një aktakuzë që tanimë e ka ngritur.”
Ndërkohë Zyra e Prokurorit të Specializuar në Hagë njoftoi sot se është duke kryer disa operacione në Kosovë, me mbështetjen e Policisë së Kosovës dhe të Misionit të Bashkimit Evropian për Sundimin e Ligjit, EULEX.
Policë dhe pjesëtarë të EULEX-it u panë para shtëpisë së Thaçit në Çagllavicë, afër Prishtinës, dhe pranë zyrave të Partisë Demokratike të Kosovës në Prishtinë.
Të enjten, Dhomat e Specializuara në Hagë kanë bërë publike aktakuzën për krime lufte kundër Thaçit, kryetarit të Partisë Demokratike të Kosovës, Kadri Veseli, shefit të Grupit Parlamentar të Lëvizjes Vetëvendosje, Rexhep Selimi, dhe ish-kryetarit të Kuvendit të Kosovës, Jakup Krasniqi.
Po ashtu të enjten, Thaçi, Veseli dhe Selimi janë transferuar në qendrën e paraburgimit të Dhomave të Specializuara në Hagë, ndërsa Krasniqi është transferuar atje një ditë më parë.
Thaçi do të dalë para Gjykatës Speciale më 9 nëntor
Dhomat e Specializuara në Hagë njoftojnë se ish-lideri politik i Ushtrisë Çlirimtare të Kosovës, njëherësh ish-presidenti i Kosovës, Hashim Thaçi do të bëjë paraqitjen e parë para gjykatës së këtij institucioni më 9 nëntor.
Seanca është caktuar të nisë nga ora 15:00 dhe do të jetë publike.
Në vendosjen e datës për paraqitjen paraprake, gjykatësi i procedurës paraprake, Nicolas Guillou ka marrë në konsideratë kërkesën e mbrojtjes së Thaçit, avokatit David Hooper që kjo të mbahet para të martës më 10 nëntor, 2020.
Dhomat e Specializuara kanë konfirmuar aktakuzën për krime lufte dhe krime kundër njerëzimit ndaj Thaçit më 26 tetor, por u bë publike më 5 nëntor.
Më 5 nëntor, Thaçi, së bashku me ish-kreun e Partisë Demokratike të Kosovës, Kadri Veselin njoftuan për konfirmimin e aktakuzës. Që të dy dhanë dorëheqje nga të gjitha funksionet politike.
Thaçi, Veseli si dhe deputeti i Lëvizjes Vetëvendosje, Rexhep Selimi dhe ish-kryetari i Kuvendit të Kosovës, Jakup Krasniqi, përmes një aktakuze të përbashkët akuzohen për krime lufte dhe krime kundër njerëzimit.
Që të gjithë gjenden në qendrën e paraburgimit në Hagë.
Sipas aktakuzës, veprat që rëndojnë ndaj Thaçit, Veselit, Selimit dhe Krasniqit kanë të bëjnë me krime lufte, ndalimit të paligjshëm ose arbitrar, trajtimit mizor, torturës dhe vrasjes së paligjshme dhe krimet kundër njerëzimit të burgosjes, akteve të tjera çnjerëzore, torturës, vrasjes së paligjshme, zhdukjes me forcë të personave dhe përndjekjes, të cilat sipas Dhomave të Specializuara, janë kryer midis marsit 1998 dhe shtatorit të vitit 1999.
Seanca e parë i është caktuar edhe Jakup Krasniqit, që do të paraqitet para Dhomave të Specializuara më 9 nëntor, duke filluar nga ora 11:00.
Dhomat e Specializuara dhe Zyra e Prokurorit të Specializuar – që ndryshe njihen edhe si Gjykata Speciale – hetojnë krimet e pretenduara të pjesëtarëve të ish-Ushtrisë Çlirimtare të Kosovës, të kryera kundër pakicave etnike dhe rivalëve politikë që nga janari i vitit 1998 e deri në dhjetor të vitit 2000.
Këto krime të pretenduara përmenden në një raport të Këshillit të Evropës, të vitit 2011, autor i të cilit është senatori zviceran, Dick Marty.
