Pasi u njoh me akuzat, Saimir Tahiri: Politika, krimi dhe drejtësia janë bashkë…

Pasi u njoh me akuzat, Ish-Ministri Brendshëm, Saimir Tahiri doli i mërzitur nga Gjykata e Krimeve të Rënda. Nuk dihet arsyeja e saktë, pse nuk është shpallur krimineli i parë në tokën shqiptare apo pse nuk u ndihmua nga shefi i tij, Edi Rama.

Gjithsesi, pasi u njoh si i pandehur me tri akuza shumë të rënda, nuk u arrestua, por doli nga Gjykata për të akuzuar dhe kërcënuar:

“Akuza ishte më e rëndë. Ishte trafik droge krijim i grupit të strukturuar kriminal kryerja e veprave penale si grup i strukturuar kriminal. Pas Aldo Bares jam i dyti me këtë akuzë. Nuk kam ndonjë surprizë të madhe prokuroria e komanduar siç e nisi e bitisi këtë histori, kështu që pavarësisht nxitjes që kam nga brenda për tu marrë me këtë histori, nuk dua të merrem, do e respektoj deri në fund për sa kohë jam deri në këtë situatë, do i shkoj deri në fund edhe duke e besuar.”

Me këtë rast ai bëri një akuzë të rëndë duke theksuar se politika, krimi dhe drejtësia janë bërë bashkë:

“Kjo historia ime, lindi si një proces politik dhe kur them i komanduar kam parasysh politikën, krimin dhe drejtësinë që janë aq bashkë sa është edhe ati biri dhe shpirti i shenjtë, nuk janë ndarë ende dhe unë po e shoh.”

Duke pasur parasysh se persona me akuza të njëjta janë burg, kur u pyet nga gazetarët nëse kishte frikë nga një kërkesë e mundshme e prokurorisë për një gjë të tillë, ai nuk shprehu habi duke e konsideruar proces të turpshëm politik:

“Mua nuk më frikëson gjë përvecc të vërtetës, nuk më intereson se ccfarë bën prokuroria, më intereson vetëm e vërteta dhe fuqia për ti shkuar deri në fund pas pasur nevojë për askënd, di që është një proces i turpshëm politik, i komanduar nga fillimi në fund, jam mësuar me vështirësi nuk do e kem problem, do t’ia dal.”

Ndonëse akuzat i kishte pa doganë, ai nuk sqaroi se nga kush është komanduar ky proces që ai e konsideron si të turpshëm dhe politik:

“Mos u përpiqni të gjeni mesazhe të koduara, nuk kam asnjë mesazh të koduar, nuk kam asnjë marrëdhënie nëntokësore me askënd jam i drejtëpërdrejtë dhe nuk kam fuqi të gënjej dhe të merrem me të pavërteta.”

Dhe në fund, sqaroi nëse e ka apo jo mbështetjen e kryeministrit Edi Rama: “Nuk më duhet fare, nuk më duhet mbështetja e askujt, por vetëm e vërteta ime. Nëse mendoni se duhet mbështetja e dikujt dhe të jesh te sqetulla e dikujt gaboni.”