Pasi u shkarkua Edi Rama, Xhaçka betohet ministre e Jashtme para Presidentit

Pasi Parlamenti i Shqipërisë shkarkoi ministrin për Evropën dhe Punët e Jashtme, Edi Rama, dhe votoi Olta Xhaçkën, kjo e fundit në orët e pasditës u betua para Presidentit të Republikës.

“Betohem në nderin tim, se do të zbatoj me përpikëri Kushtetutën dhe ligjet, si dhe do të kryej me përgjegjësi detyrën shumë të rëndësishme që më është besuar, të anëtarit të Këshillit të Ministrave”.

Ndërkohë vendin e saj si ministët i Mbrojtjes do ta zë Niko Peleshi!

Në ceremoninë e betimit ishin të pranishëm Sekretari i Përgjithshëm i kryeministrisë, Engjëll Agaçi dhe anëtarë të Kabinetit të Presidentit.

Ndryshe, me 95 vota për, 2 kundër dhe 2 abstenime, Parlamenti i Shqipërisë sot miratoi në një seancë të jashtëzakonshme shkarkimin e ministrit për Evropën dhe Punët e Jashtme, Edi Rama. Ndërkohë me 94 vota për, 4 kundër dhe 1 abstenim, votoi ministren e re për Evropën dhe Punët e Jashtme, Olta Xhaçka.

Ndërsa në vend të Olta Xhaçkës, për Niko Peleshin si ministër i Mbrojtës votuan 94 deputetë, 3 ishin kundër dhe 3 abstenuan.