Pasojat e shpërthimit në Beirut, 100 të vdekur, 4000 të plagosur, 200 mijë të pastrehë…
Një ditë pas shpërthimit të fuqishëm në Beirut dalin të dhëna të frikshme mbi pasojat e këtij shpërthimi. Kryqi i Kuq Ndërkombëtar, ICRC, raporton për vdekjen e të paktën 100 njerëzve dhe 4.000 të plagosurve duke shtuar se shifrat janë në rritje, ndërsa guvernatori i Beirutit, Marwan Abboud, sot tha se kanë mbetur mbi 200.000 njerëz p akulm mbi kokë ndërkohë ndihmat vijnë nga e gjithë bota.
“Prej 200.000 deri 250.000 njerëz kanë ngelur pa kulm mbi kokë ndërsa pushteti po bënë të gjitha përpjekjet për ti strehuar dhe për ti furnizuar me ujë dhe ushqim,” tha guvernatori i Beirutit për televizionin MTV duke shtuar:
“Kemi humbur edhe 10 pjesëtarë të shërbimit zjarrfikës të Beirutit, ndërsa dëmi i shkaktuar është vlerësuar 3-5 miliardë dollarë,” tha Abboud ndërsa rikujtoi edhe një raport i vitit 2014 ku konstatohej se mund të ndodhë një shpërthim i material shumë të rrezikshëm i cili nuk kishte kushtet e duhura në depo, dhe nuk garanton sigurinë publike.
Ministri i shëndetësisë libaneze Hamad Hasan ka këshilluar qytetarët që kush mundet të largohet nga Bejruti sepse materialet e rrezikshme të shpërndara në ajër mund të kenë një efekt vdekshmërie afatgjatë.
Ndryshe, informacioni paraprak i pushtetit në Liban flet për shpërthimin nga pakujdesia të 2.700 tonëve të nitrat amoniumit i cili ndodhej në një depo në port, ndërsa Presidenti i SHBA, Donald Trump, tha se ishte konsultuar me gjeneralët për shpërthimin dhe ata mendojnë se ishte sulm me bombë:
“Kam takuar gjeneralët tanë dhe duket se nuk është një aksident industrial. Sipas tyre, duket se është një sulm, një bombë e një lloji tjetër,” tha Presidenti Trump duke shtuar se SHBA do të ndihmojnë Libanin.
