Pastrim 18 mln euro të mafies italiane, SPAK kërkon 13 vite burg për biznesmenin Rezart Taçi
SPAK ka kërkuar dënimin me 13 vite burg për biznesmenin Rezart Taci. Biznesmeni në arrati po gjykohet në mungesë për pastrim parash, në kuadër të grupit të strukturuar kriminal.
Ndërkohë kreu i SPAK, Klodian Braho, ka kërkuar konfiskimin dhe kalimin në favor të shtetit të 18 milionë eurove që dyshohet se i përkasin mafias italiane.
Kërkesa është paraqitur në kuadër të një hetimi të gjerë kundër veprimtarisë kriminale me origjinë nga Italia, ku autoritetet shqiptare kanë bashkëpunuar ngushtë me homologët italianë.
Sipas akuzës, shuma prej 18 milionë eurosh dyshohet se rrjedh nga aktivitete të paligjshme dhe është investuar apo qarkulluar përmes skemave të ndryshme për pastrim parash.
Hetimi
Rezart Taçi u shpall në kërkim ndërkombëtar nga SPAK në nëntor të vitit 2021, pasi u akuzua se ishte përfshirë në një operacion financiar për fshehjen e mbi 18 milionë eurove nga konfiskimi në Itali dhe pastrimin e tyre në Shqipëri, të organizatës mafioze “Cosa Nostra”.
Më 25 prill 2023, Gjykata e Posaçme deklaroi fajtorë dhe dënoi dy të besuarit e Rezart Taçit në këtë veprimtari kriminale, Artur Ballën dhe Bledar Lilon, vendimmarrje që u la në fuqi nga Apeli në muajin tetor, po të vitit të kaluar.
Sipas hetimit të zhvilluar nga drejtoria Antimafia në Prokurorinë e Palermos dhe nga SPAK, operacioni financiar për pastrimin e parave është shtrirë në Itali, Zvicër dhe Tiranë. Atëherë u raportua se si pjesë e këtij operacioni përfundoi në arrest shtëpiak sipërmarrësi 90 vjeçar italian, Francesco Zummo, i hetuar më parë nga magjistrati Giovanni Falcone si i dyshuar për favorizimin e organizatës mafioze “Cosa Nostra”.
Prokuroria e Palermos arrestoi gjithashtu kontabilistin Fabio Petruzzella, vëllai i një magjistrati palermitan që jeton dhe punon në Milano. Sipas SPAK, skema financiare është drejtuar nga Zummo dhe Petruzella, në bashkëpunim me një shtetas zviceran me origjinë italiane dhe ish-bosin shqiptar të naftës, Rezart Taçi.
Transaksionet bankare të kryera nga të arrestuarit në një bankë të nivelit të dytë në Shqipëri, janë realizuar pjesërisht pas ndërhyrjes së SPAK dhe sekuestrimit të 18 milionë eurove.
