Patriot si Meta dhe Tradhtar si Rama!
nga Agim Popoci
Presidenti Ilir Meta në përplasje me Kryeministrin Edi Rama dhe me ndihmën e shpurës së tij mediatike, përmes mosdekretimit të ministrit të Jashtëm, Gent Cakaj u mundua të na tregoj se sa patriot që është, dhe se nuk e zë gjumi ndërsa mendon për Kosovën dhe kufijtë e saj; Për këtë arsye refuzon të dekretoj ministrin e Edi Ramës, i cili është i gatshëm të ndryshoj kufijtë e Kosovës.
Dhe, nga ana tjetër, Edi Rama u konsiderua tradhtar sepse i shkon në mendje që një çunak kosovar si Gent Cakaj, të papërvojë dhe që nuk dihet se nga vjen, ta bëjë ministër të Jashtëm edhe pse ai është i gatshëm ta shes tokën e Kosovës.
Nga ana tjetër, Edi Rama dora vetë, i konsideron tradhtar të gjithë ata, duke përfshirë edhe Presidentin Ilir Meta që kundërshton një kosovar për ministër të Jashtëm!
Gjykuar nga aktet, biografinë dhe karrierën politike, si Ilir Meta ashtu edhe Edi Rama nuk karakterizohen me ndonjë patriotizëm, ndonëse në grahmat e tyre të pushtetit, kur nuk kanë më asgjë për të shitur, shesin patriotizëm.
Por, që të dy, të rritur në një ambient familjar komunist, ku patriot quheshin të gjithë ata që kishin marrë pjesë në luftë, dhe tradhtar ishin të gjithë ata që kishin qëndruar në shtëpi, kanë një ves shumë më të keq se sa dashurisë për patriotin përkatësisht urrejtjes për tradhtarin, përkufizuesin e patriotit dhe tradhtarit!
Duke pasur parasysh se si Meta ashtu edhe Rama vijnë nga partia PPSH, e cila u krijua nga Dushan Mugosha dhe Milladin Popoviçi, përkufizimi që iu bë patriotit dhe tradhtarit, ngatërron shumë gjëra në mendësinë e tyre. Dhe, nëse kësaj i shtohet edhe dashuria për Kosovën, patriotizmi futet në rrugë pa krye!
Sipas Mugoshës dhe Popoviçit, tradhtar ishin patriotët më të mëdhenj shqiptar, ballistët, dhe patriotë ishin ata që e bënë nulë Konferencën e Bujanit, vendimet e së cilës parashikonin bashkimin e Kosovës me Shqipërinë. Dhe, pikërisht me këta patriotë që bënë nulë Konferencën e Bujanit, sot si Meta dhe Rama festojnë 29 Nëntorin, Ditën e Republikës së RSFJ-së.
Sot, kur Ilir Meta e konsideron veten patriot sepse nuk dekreton Cakajn, të gjithë e kujtojnë kryeministër Metën e vitit 2001 kur mbylli të vetmen pikë zyrtare kontakti që kishin kosovarët me shtetin shqiptar, dhe, pse jo, botën, Ambasadën e Kosovës në Tiranë. U arsyetua se ja kishte kërkuar UNMIK-u, por të vetmit që ishin të interesuar dhe ju pengonte një Zyrë simbol i ekzistimit të shtetit të Kosovës ishte vetëm Beogradi zyrtar. Dhe jo vetëm kaq!
Pas mbylljes së kësaj Ambasade, u aktualizua ndarja e Kosovës nga kryeministri i Serbisë, Zoran Gjingjiç që dihet që mik të ngushtë kishte kryeministrin Meta. Nëse Cakaj edhe mund ta mendoj, kjo nuk është thënë qartësisht, ndonjë korrigjim të vijës kufitare, ai vetëm si Gjingjiçi nuk e ka menduar, deri në Prishtinë! Aty ku kishte vënë gishtin Gjingjiçi dhe Ilir Meta shkon vetëm për të pirë kafe ose drekuar me Ramush Haradinajn!
Sot, për kufijtë ekzistues të Kosovës, Ilir Meta nuk ka kurrfarë merita ndonëse ka një karrierë të madhe politike, që i kishte lejuar të qenurit në krye të forumit rinor socialist. FRESSH prodhoi shumë ministra por çuditërisht asnjë patriot, e lëre më dashamirës të Kosovës. Dhe jo vetëm kaq! Momenti kur Ilir Meta arriti në kupolën socialiste ishte historik, aq më shumë si njeriu i dytë i qeverisë shqiptare kur në Kosovë po zhvillohej lufta e shekullit, Perëndimit kundër Serbisë.
Sot njeriu më i rëndësishëm i qeverisë shqiptare në epokën kur u vendos për Kosovën, Zv/kryeministri dhe Kryeministri Ilir Meta, në Kosovë ka mik Ramush Haradinajn. Të tjerët intelektualë në Prishtinë dhe jo vetëm, as nuk dinë dhe as nuk duan t’ia dinë për Ilir Metën. Edhe kur e takojnë, takimi është zyrtarë, përmes diplomatëve ose ish-diplomatëve shqiptarë që kanë shërbyer ose spiunuar në Kosovë. Ky është patrioti Ilir Meta!
Tradhtari Edi Rama! Për Presidentin Ilir Meta dhe bashkëpunëtorët e tij mund të konsiderohet i tillë por jo edhe për të gjithë shqiptarët. Jo pse në luftë, ashtu si edhe në këngën e Edgar Lee Masters vdesin ata që nuk e dinë kuptimin e fjalës “patria”.
Edi Rama mund të akuzohet për tradhtar ose që nuk e do Kosovën, aq sa mund të akuzohet pse është i gjatë; Ose pse ëshë i biri Kristaqit.
Çfarë ndjesie mund të ketë Edi Rama për Kosovën kur askush në jetën e tij nuk i ka folur për tokën e Kosovës. Ai mund ti vejë një avioni emrin Lasgush, por ai thotë se është nxënësi i bolshevikut Noli; Ai në Pogradec, ashtu si edhe patrioti Ilir Meta, në ditëlindjen e Lagush Poradecit mburren që kanë bolshevikun Sterjo Spase, dhe kurrë për asnjë çast nuk e nxjerrin dot nga goja Dhimitër Paskon. Jo vetëm për dashurinë që kishte për Kosovën, por ai ishte patriot siç e nuk e kishte projektuar Mugosha dhe Popoviçi.
Sot, kur Ilir Meta e quan tradhtar dhe Edi Rama thotë se është patriot dhe vdes për Kosovën, jo pse e la Aleksandar Vuçiçin të thotë në zemër të Tiranës se Kosova është Serbi, jo pse i dha çelësin e Tiranës kriminelit Goran Bregoviç, kryeministri Edi Rama nuk mund të akuzohet se nuk e do Kosovën. Nuk mund të akuzohet as pse mburret se mikun më të shtrenjtë në Kosovë e ka mikun e mikut të Stanishiqit, Baton Haxhiun. Sot, si Ilir Meta ashtu edhe Edi Rama e duan Kosovën, por e duan siç e don Nëna e tyre Parti, si Dushan Mugosha dhe Milladin Popoviçi, nën Serbi!
