Patronazhistët me të qeshur, sot Edi Rama: Përpjekje për destabilizim nga opozita!
Databazën me patronazhistët e kishte pranuar me të qeshur, por sot kur publikimi i listës së rrogave vazhdon me muajin prill për 694.473 qytetarë shqiptarë ose rreth 60 mijë më shumë se lista e parë e janarit, Kryeministri Edi Rama vendosi ti drejtohet publikut i shoqëruar nga Drejtorja e Përgjithshme e Agjensisë Kombëtare të Shoqërisë së Informacionit, AKSHI, Mirlinda Karçanaj, për t’iu thënë të gjithë atyre që dyshuan se ai nuk e gjen dot fajtorin, se dhe pa folur Prokuroria, Rama e ka gjetur se kjo është një përpjekje për destabilizim nga foltoret e kuvendeve të antikuvendeve.
Duke e relativizuar këtë skandal me faktin se sulme kibernetike dhe rrjedhje të të dhënave private ndodhin në shumë vende të botës si në SHBA, Kanada, Rusi e Francë, të gjithë atyre që menduan se dikush edhe mund të jap dorëheqje pas këtij Skandali të përmasave të frikshme, Kryeminstri Edi Rama e tha qartë se dorëheqje nuk kishte as në Amerikë!
“Sot ju kemi ftuar për të folur për ngjarjen e qarkullimit të të dhënave mbi pagat e qytetarëve shqiptarë. Në radhë të parë dua t’iu kërkoj një ndjesë të gjithëve që janë shqetësuar me të drejtë për këtë ndërhyrje në këtë aspekt të jetës së tyre private. Ndërkohë dua ta nënvizoj që në fillim se kjo është një ngjarje, e cila meriton të hetohet imtësisht. Uroj, shpresoj dhe ju bëj thirrje organeve ligjzbatuese që ta kryejnë këtë hetim me të gjithë kapacitetet e tyre. Nga ana tjetër, dëshiroj të ndaj me publikun se në këndvështrimin tim nuk është e vështirë të shohësh se këtu ka një qëllim jo fort të vështirë për të krijuar konfuzion dhe për të nxitur destabilitet, në një përpjekje që nuk është e para.
Duke pasur parasysh edhe deklarata të bëra nga foltoret e kuvendeve të antikuvendeve mund të mos jetë e fundit, prandaj thirrja ime për prokurorinë është që të hetojë, duke kërkuar që të përgjigjen jo vetëm të gjithë pa përjashtim inspektorët e Tatimeve, që kanë akses në sistemin e pagave për arsye të punës, ata që aktualisht punojnë në këtë sistem, apo të tjerë që mund të jenë larguar nga ky sistem në periudhën nga të dhënat e nxjerra deri sot, por edhe ata që nga foltoret e kuvendeve të antikuvendeve paralajmërojnë zymtyra të tjera,” tha Edi Rama duke e cilësuar publikimin e pagave të 637.138 shqiptarëve si një lëvizje të qëllimshme për të krijuar armiqësi mes njerëzve dhe qeverisë, e gjithmonë kur flitet për këto akuza i akuzuar gjithmonë ngelet Sali Berisha.
“Qytetarët që janë të sekëlldisur nga dalja e pagave duhet të dinë si mund të ketë ndodhur. Përdorimi politik i kësaj ngjarjeje është në sytë e të gjithëve dhe ngjashmëria me ngjarjen e mëparshme është në sytë e të gjithëve. Unë kam dhe një ide pse nuk është përdorur publikisht deri kur kanë mbaruar zgjedhjet, por është një ide e imja, se pse përdoret tani. Që është patjetër për të krijuar konfuzion dhe për të nxitur armiqësi mes njerëzve dhe nesh, kjo është shumë e qartë. Por t’ua bësh këtë njerëzve për të nxjerrë bravën nga çelësi apo për të futur çelësin në bravë, apo se je bërë xheloz se ke mbetur jashtë bravës e çelësit dhe hedh gurin tënd që mos të merret njeri me bravën e çelësin, apo çdo arsye tjetër, është vetëm një mundësi për t’iu treguar njerëzve se deri ku mund të shkojnë bravaxhinjtë, çelësaxhinjtë. Nga pikëpamja konkrete, kjo është çështje e sistemit, ata që s’dinë të bëjnë gjë tjetër.
Ajo që na duhet neve është të sqarojmë opinionin, që këtu nuk bëhet fjalë për penetrim në sistemin e shërbimit, pasi ky është një sistem pune, jo shërbimi. Është sistem i brendshëm pune, jo sistem shërbimi që është penetruar. E dyta, insistoj që prokuroria duhet të bëjë një hetim tërësor dhe gjithëpërfshirës, për të gjithë ata që kanë lidhje me sistemin e pagave. Është bërë një hetim shumë i thellë për atë të parën dhe faktikisht ka treguar që gjëja është shumë e ngjashme me këtë të dytën, por kjo e dyta duhet hetuar,” tha Kryeministri Rama ndërsa Drejtorja e AKSHI-t dha një shifër të frikshme mbi sulmet kibernetike në muaj:
“Në çdo sistem, në varësi të nevojës që ka institucioni, që staf i caktuar të kryejë funksione të caktuara, përcaktohen lista të qarta të personave që duhet të aksesojnë sistemin dhe të nivelit të aksesit. AKSHI ka nevojë mbi personat që ju japin aksesin e duhur atyre, që janë staf i AKSHI. Kemi rreth 1 milion sulme që na ndodhin çdo muaj. Kemi pajisje fizike shumë të mirë që na mbron nga sulmi didos. Vazhdojnë sulmet e tjera, tentojnë në të gjitha mënyrat të kenë sukses, nuk përjashtohet mundësia edhe kur të kenë sukses. Detyra jonë është të bëjmë investimet e duhura dhe të përgatisim stafin.”
Kryeministri Edi Rama dëshmoi sot se din edhe të falënderoi kazanët mediatik dhe arsyeja ishte që ato nuk kanë publikuar të dhëna për pagat.
“Dua të falënderoj të gjitha mediat, ekranet në mënyrë të posaçme që me të drejtën e tyre e kanë komentuar, por nuk kanë nxjerrë të dhëna sidoqoftë, po kështu dhe të gjithë ata që nuk kanë bërë këtë krim në portalet e veta. Ata të cilët janë shmangur nga mosekspozimi i të dhënave në media dhe kanë përdorur whatsapp, mbase e kanë pasur parasysh këtë gjë. Edhe ky është një fakt interesant, nuk u shmangën herën e parë, janë shmangur këtë herë. Interesante, nuk aludoj,” tha Rama duke shtuar:
Kjo bazë ka dalë në një ‘tik tok’ para disa muajsh dhe nuk është përdorur, po është përdorur tani. Pse zëdhënës të gratanongrata paralajmërojnë të tjera. Është dorë qartësisht për konfuzion dhe pasiguri publike. Këtu nuk ka asnjë mundësi tjetër përveçse ne të vazhdojmë revolucionin dixhital. Mbase këtë e ka nxitur dhe fakti se për disa javë me radhë kemi ndërmarrë një tur sensibilizimi për të informuar qytetarët se do të mbyllen sportelet dhe do jetë gjithçka online. Ne nuk do të na pengojnë këta që hedhin gurin, fshehin dorën, nxjerrin fytyrën. Nuk dua të spekuloj, siç bëjnë ata. Nuk bëj asnjë asociim me askënd, por them që ky është një rast domethënëse për deri ku mund të shkojnë njerëz dhe forca të caktuara kundër qytetarëve për qëllimet e tyre. Nga ana jonë do të bëjmë maksimumin që të forcojmë kapacitetet për të krijuar mure pas mure, sepse jemi shumë të ekspozuar.”
Përkundër përpjekjes për të bindur qytetarët me ca shpjegime dhe ndjesën publike, Kryeministri Edi Rama përfundua te sokaku i tij i të marrëve në Partinë Socialiste, për t’iu thënë se kjo nuk është asgjë sepse sulme kibernetike dhe rrjedhje të të dhënave private ndodhin edhe në SHBA, Kanada, Rusi e Francë.
“Në radhë të parë qytetarët duhet të jenë të qartë që të gjitha ndërveprimet me e-Albania janë pjesë e një sistemi krejt tjetër, ndërkohë sistemi i punës së tatimeve është i vjetër dhe ne apo AKSHI ka bërë vijimësisht përpjekje dhe ka sjell rezultate. Sa i përket individëve më lejoni të them disa rate. Në SHBA dolën të gjitha sekretet e botës rrugëve nga individë. Rasti i famshëm i personazhit që mblodhi gjithçka kishte detyrë të mbronte dhe shkoi i ekspozoi te kundërshtarët e SHBA. Rasti i Kanadasë në 2020, ku shumë mësues u gjetën viktima të dikujt që kishte përdorur kredenciale të rreme për të marrë identitet e individëve që punonin si mësues. Ndryshe nga këtu ku karta e ID, që ku u shfaq si problem s’ka asgjë brenda, në sistemin kanadez ka shumë të dhëna personale. Në SHBA kompania biometrike që furnizon policinë metropolitanë të Londrës u gjet e infiltruar dhe nuk arriti të ndalte ekspozimin e mbi 1 mln gjurmësh të gishtërinjve.
Në shtator në Francë pat një sulm kibernetik agresiv dhe mori të dhënat e individëve që emigronin në Francë. Të dhëna pa fund, edhe të dhëna sensitive. Këtë sfidë e kanë të gjithë. Ajo që të gjithë bëjnë edhe që ne do të bëjmë është të rrëzim numrin e mureve mbrojtëse dhe ta bëjmë sa më të ngushtë aksesimin e sistemit nga një individë. Konkretisht në inspektorin e tatimeve është libri i tatimeve. Ato e kanë të domosdoshme atë libër. Marrja e një aleati në këtë rrugë, do të na e forcojë kapacitetin e rezistencës.
Në këtë rast dua të them edhe diçka tjetër. Kjo ngjan shumë me nxjerrjen e numrave të kartave të ID, ngjan në teknologjinë e nxjerrjes, propagandës që e shoqëron dhe s’dua të bëj këtu politikë. Kur gjendesh përpara situatash të tillë duhet të jemi të gjithë bashkë. Kushdo e ka kryer këtë krim s’ka qenë i shoqëruar nga ndonjë. Këtu është hapur një derë në mënyrë të paligjshme nga individë. Këto janë nata me ditën dhe s’mund të përdorim rastet për t’u hedhur në akuzë. Në rastin e parë e kam marrë me të qeshur, duke pasur parasysh faktin se kartat e ID janë krejtësisht pa asnjë rëndësi për jetën e qytetarëve, janë targa. Nuk i duhet fare, zero numri i kartës PS. Ka edhe një element tjetër. Databaza e nxjerrë në atë kohë ngjan shumë me databazën e nxjerrë tani. Nuk është një databazë e eksportuar e tëra, integrale, është një bazë të dhënash e përpunuar copa-copa. Aty mungojnë rreth 60 mijë të tjerë. Aty ka plot të dhëna që janë të vjetra. Çdo të thotë kjo? Sepse nuk janë të dhëna të sotme, as të janarit, marsit apo prillit, janë të vjetra. Nuk është databaza e marrë në janar, sepse nuk do të kishte aty rekorde të vjetra që njerëzit që nuk figurojnë më nuk do të kishte këto gjëra.
E fundit, ky sistem është sistemi i cili në vitin 2013 u kthye në një kaos publik, në një hetim të prokurorisë, pati dhe të arrestuar për fshirjen e TVSH. Është marrë masa në bashkëpunim me kompaninë për të mbyllur këtë rrugë dhe sot është i pamundur për t’u futur në sistem. Një pjesë e madhe janë rroga që dihet, por në marrëdhëniet e brendshme të kompanive private ky është shqetësim dhe i kërkoj ndjesë, tha Kryeministri Edi Rama duke kërcënuar të gjitha ata që kanë akses në këto sisteme nuk do ta kalojnë lehtë ndërsa përfundoi:
“Gjendet apo jo autori është gjë tjetër. Çdo inspektor, janë më shumë se 100, që kanë akses në sistemin e agave për arsye të punës, duhet të merren në hetim, pa asnjë përjashtim. Po ashtu duhet të merren nën hetim edhe ata persona që kanë dalë në xhihaliset politike.”
