Pazari Rama-Meta/ Presidenti nuk u shkarkua, kryebashkiakët ngelin ata që u zgjodhën më 30 Qershor

Pas një fjalimi absurd të Kryeministrit Edi Rama që as “gjeniu rilindas” Ditmir Bushati nuk mund ta kuptoj, Parlamenti i Shqipërisë, me 78 vota për, 17 kundër dhe 8 abstenime, duke miratuar Raportin e Komisionit Hetimor iu tha shqiptarëve se Presidenti i Republikës, Ilir Meta, nuk do të shkarkohet edhe pse anuloi zgjedhjet e 30 Qershorit dhe dekretoi zgjedhjet në 13 Tetor, ama pushteti lokal i zgjedhur në 30 Qershor do të vazhdoj të qeveris.

Ky pazar i pistë i dyshes shkatërrimtare të vendit Rama-Meta, u bë edhe më turbullt kur në foltoren e Parlamentit doli i plotëfuqishmi i seancës plenare Edi Rama dhe tha se Presidenti Ilir Meta ka kryer një sërë shkeljesh, por sipas tij, Komisioni i Venecias rekomandoi se këto shkelje nuk janë aq të rënda, sa për ta shkarkuar.

“Komisioni i Venecias ka nxjerrë një sërë shkeljes të Presidentit. Janë e shkruar e zeza mbi të bardhë shkeljet e tij, që flasin qartë për vendimin tonë për t’ia kaluar këto shkelje këtij komisioni hetimor, që ka bërë një punë voluminoze dhe ka dhënë një ndihmë të madhe me rekomandimet përkatëse, bazuar mbi gjithë analizën e Komisionit të Venecias dhe të gjitha gjetjet përkatëse lidhur me veprimtarinë e presidentit në ato drejtime që ne kemi parë të arsyeshme të hyjmë në këtë proces. Por, edhe në këtë rast, është një tjetër mundësi për të parë qartë dallimin mes nesh dhe gjithckaje që thuhet gabimisht ose keqdashësisht për ne.

Ne e kemi lexuar me shumë vëmendje raportin e Komisionit të Venecias dhe nuk e kemi konsideruar ndonjëherë këtë komision si një aneks të punës sonë, por si një pikë referimmi. Përderisa ky komision thotë ‘sipas gjykimit tim shkeljet e bëra nuk janë mjaftueshmërisht të rënda për të shkarkuar presidentin’, ne kemi parë me shumë vëmendje këto konstatime, që nuk na rekomandon ta shkarkojmë presidentin, por të marrim masa për të ardhmen, në mënyrë që të kufizojmë hapësirën e abuzimit.”

Kryeministri Edi Rama foli edhe me tone të ashpra ndaj Presidentit Ilir Meta, duke thënë se është i vetmi President në vend, që e ka kthyer zyrën e këtij institucioni në seli të njëanshme dhe vatër të hedhjes së zjarrit edhe pse kjo pak ka rëndësi kur ai ngeli Presidenti pashkarkuar:

“Të gjithë harrojnë se Ilir Meta u bë presidentit me votat e tij dhe tonat, se nuk i kishim votat. Që në atë kohë e kam thënë që zgjodhëm presidentin më të mirë që mund të kishte opozita për veten e vet. As unë vetë nuk e kisha paraparë që presidenti do të ishte aq i mirë për opozitën, sa do të bëhej i keq për Shqipërinë, me akte vandale ndaj Kushtetutës dhe me akte në kundërshtim të plotë me traditën e vendosur në atë zyrë nga presidentë të tjerë, që asnjëherë nuk shkuan përtej korrnizës kushtetuese.

Përpara Ilir Metës, Bujar Nishani duket si George Uashingtoni. Nëse e ndajmë Nishanin në dy pjesë, në atë të statuseve dhe intervistave pa frena dhe në atë të firmave si president në funksion të kryerjes së detyrës, Nishani i parë ishte një sekëlldi për Kushtetutën dhe shoqërinë në pikëpamje të të qenit simbol i unitetit kombëtar, ndërsa i dyti ishte absolutisht në rregull me Kushtetutën. Të njëjtën gjë mund të themi për të gjithë presidentët, por jo për Ilir Metën, që e ka kthyer zyrën e presidentit në seli të njëanshme dhe në një vatër të hedhjes në zjarr, duke përdorur Kushtetutën si letër dhe mllefin e tij ndaj shumicës si degëzim. Presidenti i ka bërë shkeljet dhe i ka bërë vençe.”

Kryeministri Rama tha se Presidenti Ilir Meta duhet shkarkuar, por një vendim i tillë nuk do të merret, për shkak se Komisioni i Venecias ka rekomanduar se shkeljet e tij nuk janë aq të rënda.

“Ne kemi qenë dhe mbetemi gjithmonë për dialog, s’kam refuzuar unë ndonjëherë të ulem me Lulzim Bashën, por ka refuzuar ai në vijimësi të ulet me mua. Dhe me idenë gjithmonë të pengmarrjes, por peng PS dhe qeverinë tonë nuk e merr dot askush në gjithë botën. E para iu them atyre që e komentojnë këtë vendim si dnryshim të kursit tonë në raport me Ilir Metën, jo nuk është kështu. Ne mendojmë se Meta duhet shkarkuar, por ne jemi ndryshe nga ju. Ne nuk themi se jemi vetëm ne dhe bëjmë si të duam.

Komisioni i Venecias na e ka dhënë këtë fjali para syve, se shkeljet nuk janë aq të rënda. Ne mendojmë se janë shumë më të rënda, por në respekt të së vërtetës se ne nuk i kemi ngritur asnjëherë vendimmarrjet tona mbi të drejtën e pagabueshmërisë. Mbase kanë të drejtë ata, edhe pse unë mendoj se kemi ne të drejtë, por ne nuk përfaqësojmë vetëm disa njerëz, por shtetin shqiptar seriozisht. Pra, Ilir Meta meriton të shkarkohet, por përderisa kemi këtë rekomandim të Venecias, atëherë i nënshtrohemi kësaj.”

Në fund Edi Rama u pa maskë ashtu siç ishte para këtij fjalimi absurd ndërsa Ilir Meta si njëri ndër shqiptarët më të pasur që është, me siguri i frikësuar nga maska, heshti! Madje nuk iu tregoi shqiptarëve edhe atë shqiponjën e 2 Marsit në gjunjë, kur dëshmoi se jo vetëm që nuk ka respekt ndaj institucionit të Presidentit por për pushtet nuk ka respekt as për veten e vet.