“PD-Aleanca për ndryshim” fitore edhe me tradhëtarët Bamir Topi e Artur Roshi!
“Partia Demokratike – Aleanca për ndryshim” është koalicioni që do të përballet me Edi Ramën së bashku me partinë Lëvizja Socialiste për Integrim në zgjedhjet e 25 Prillit. Në përpjekje për ndryshim duke sjellë risi jo pak të vogëla pas vendimit të Kryetarit të PD, Lulzim Basha, për tu hapur, me Marrëveshjen për krijimin e koalicionit “Aleanca për ndryshim” Partia Demokratike vjen me një ofertë gjithëpërfshirëse opozitare për, siç thuhet, garantimin e fitores në zgjedhjet e ardhshme.
Befasi e këtij koalicioni padyshim janë Fryma e Re Demokratike e Bamir Topit, Balli Kombëtar Demokrat i Artur Roshit dhe Kristian Demokratët e Mark Frrokut, që ndonëse kanë shkëmbyer akuza nga më të ndryshmet me Partinë Demokratike, bëhen bashkë në betejën për ta rrëzuar të keqen më të madhe të këtij vendi, Edi Ramën!
Prania e këtyre partive me liderët e saj levantinë, fillimisht ka ngjallur pakënaqësi të mëdha ndër demokratë por ata kanë reflektuar shumë shpejtë ndonëse bëhej fjalë për Bamir Topin që i tradhëtoi me Edi Ramën duke i dal kundër PD-së si në rastin e 21 Janarit ashtu dhe lumin me akuza në librin e tij të kujtimeve me gjizë e raki; Artur Roshin që e mbajti në jetë qeverinë e Edi Ramës pas tradhtisë që i bëri dorëzimit të mandateve nga opozita; Dhe, Mark Frrokut, një aelati të Edi Ramës i cili u akuzua se vjen nga bota e krimit dhe ishte njëri nga protagonistët që u përdor për futjen dhe miratimin e Ligjit të Kriminalizimit në Parlament.
Demokratët e kuptuan se sa me fat që janë, ndryshe sikur krimineli Enver Hoxha të ishte gjallë do të mund ta kishin edhe pjesë të koalicionit me qëllim të rrëzimit të Edi Ramës.
Kështu, Marrëveshjen e koalicionit “Partia Demokratike – Aleanca për Ndryshim” e kanë firmosur:
1. PARTIA DEMOKRATIKE- Lulzim BASHA;
2. PARTIA REPUBLIKANE- Fatmir MEDIU;
3. PARTIA PËR DREJTËSI INTEGRIM DHE UNITET- Shpëtim IDRIZI;
4. PARTIA LËVIZJA PËR ZHVILLIM KOMBËTAR- Dashamir SHEHI;
5. PARTIA BASHKIMI PËR TË DREJTAT E NJERIUT- Vangjel Dule;
6. PARTIA AGRARE AMBIENTALISTE- Agron DUKA;
7. PARTIA DEMOKRISTIANE- Nard Ndoka;
8. PARTIA FRYMA E RE DEMOKRATIKE- Bamir Topi;
9. PARTIA BASHKIMI LIBERAL DEMOKRAT- Arian Starova;
10. PARTIA BALLI KOMBËTAR DEMOKRAT- Artur Roshi;
11. PARTIA BASHKIMI DEMOKRAT- Ylber Valteri;
12. PARTIA MENDIMI DJATHTË LIBERAL – Mustafa Lici;
13. PARTIA LËVIZJA E LEGALITETIT- Shpëtim Axhami;
14. PARTIA KRISTIAN DEMOKRATE, Dhimitër Muslia.
Në Marrëveshjen e siguruar nga Pafrike.al thuhet se partitë bashkohen që të garantojnë fitoren në zgjedhjet e ardhshme, për t’i sjellë ndryshimin Shqipërisë:
“Ne po bashkohemi, si parti dhe si qytetarë, për t’i sjellë ndryshimin Shqipërisë”.
Ne bashkohemi që të garantojmë fitoren në zgjedhjet e ardhshme dhe t’i sjellim ndryshim vendit tonë.
Të gjithë e dimë që duhet ndryshim. Shqiptarët janë të fortë, Shqipëria është e fortë. Ka vetëm një njeri përgjegjës për dështimin e Shqipërisë në 8 vitet e fundit dhe ky është Edi Rama.
Ne po ndajmë të njëjtat vlera e parime në veprimtarinë e përgjithshme politike, si edhe në vizionin për qeverisjen e vendit. Dëshirojmë të koordinojmë angazhimet dhe kontributin për fitoren e përbashkët politike dhe prandaj:
Vendosëm që:
Të formojmë një koalicion për të konkurruar së bashku në zgjedhjet për Kuvendin të datës 25 prill 2021.
Në marrëveshje përcaktohet emri i koalicionit “Partia Demokratike-Aleanca për Ndryshim”, shkronjat nistore të koalicionit “PD-AN” dhe sigla e koalicionit. Gjithashtu thuhet se partia udhëheqëse e koalicionit është Partia Demokratike e Shqipërisë.
Partitë aleate autorizojnë z.Lulzim Basha, kryetar i Partisë Demokratike që të paraqesë pranë Komisionit Qendror të Zgjedhjeve (KQZ) listat shumëemërore të kandidatëve për deputet, si dhe çdo dokumentacion tjetër të nevojshëm për regjistrimin e koalicionit dhe kandidatëve deri në përfundim të procesit zgjedhor.
Po kështu autorizohet Ivi Kaso që:
Të paraqesë kërkesë për regjistrimin e Koalicionit “Partia Demokratike-Aleanca për Ndryshim”, së bashku me këtë marrëveshje, pranë KQZ-së.
Të përfaqësojë Koalicionin gjatë procedurës së shortit, në KQZ, për renditjen e subjekteve zgjedhore në fletën e votimit.
Të caktojë vëzhguesit e Koalicionit në KZAZ-të, KQV-të dhe VNV-të, në të gjithë vendin.
Termat konkrete të bashkëpunimit brenda koalicionit do të përcaktohen nëpërmjet marrëveshjeve dypalëshe të partive politike në përbërje të tij. Numri përkatës i kandidatëve që do të propozojë çdo parti brenda koalicionit do të specifikohet në momentin e depozitimit të listës shumëemërore të kandidatëve të koalicionit, sipas modelit të përcaktuar në aneksin e Udhëzimit nr.1 dt. 23.12.2020 të KQZ.
Në listën shumëemërore të koalicionit zgjedhor do të përfshihen, për çdo parti të koalicionit, numri i kandidatëve dhe renditja e tyre, bazuar në peshën elektorale që rezulton për secilën parti. Kandidatët në listat shumëemërore të koalicionit, pavarësisht se cilës parti i përkasin, do të konsiderohen dhe vlerësohen si kandidatë vetëm të koalicionit, duke shmangur trajtimi ne tyre sipas përkatësive partiake.
Kjo marrëveshje hyn në fuqi menjëherë ditën e nënshkrimit të saj.
