PD kërkesa Edi Ramës, Berisha: Në revoltën e ardhshme, shqiptarët do të vendosin…

Në rrethana emergjente kur po rrënohet me shpejtësi ekonomia shqiptare, dhe, për fat të keq, sektori kryesori ekonomisë së vendit, turizmi, Partia Demokratike kërkon vendosjen e menjëhershme të subvencionimit të plotë të të gjitha biletave të transportit urban dhe inter-urban në territorin e Shqipërisë.

“Partia Demokratike kërkon dhe përgjysmimin e menjëhershëm të taksës së naftës, e cila në Shqipëri, me vlerën 1.1 euro është më e larta në botë, dhe është shndërruar në një faktor kryesor të çmimit stratosferik të kësaj lënde djegëse,” thekson Kryetari i PD, Sali Berisha, dhe për të gjithë ata që mendojnë se arka do boshatiset, shton se mjafton që qeveria të zhdoganojë rreth 250 mijë ton naftë që kalojnë jashtë sistemit doganor në Shqipëri.

“Natyrisht unë jam i vetëdijshëm se Edi Rama, me arrogancën e tij dhe vesin e tmerrshëm të vjedhjes dhe pasurimit, duke vjedhur fonde dhe pasuritë publike, nuk merr dhe nuk do marrë parasysh këto kërkesa<” shprehet Kryetari i PD duke garantuar se qytetarët shqiptarë në revoltën e tyre të ardhshme do të vendosin për këto kërkesa, dhe kërkesa të tjera të programit të emergjencës së Partisë Demokratike, siç është indeksimi i çmimeve dhe masa të tjera shumë të rëndësishme.

Deklaratë:

Në kushtet e përkeqësimit të shpejtë të kushteve ekonomike të vendit dhe të qytetarëve shqiptarë për shkak:

Së pari të çmimeve stratosferike të krijuara në mënyrën më artificiale nga bordet e Edi Ramës;

Për shkak të përdorimit të të ardhurave buxhetore nga Edi Rama dhe qeveria e tij në funksion të vjedhjeve dhe shpërdorimit të tyrë masiv. Siç është rasti i disbursimit të vazhdueshëm të fondeve publike mbi veprën e krimit, tashmë të cilësuar e tillë, te djegësat e Fierit dhe të Tiranës, siç është rasti i ligjit të parlamentit për të financuar me qindra milionë euro klientelën e Edi Ramës, me të cilët ndan paratë; Siç është rasti i prokurimeve, siç është ai i Korridorit Blu apo “korridorit të hajnisë”.

Të gjitha këto po rrënojnë me shpejtësi ekonominë shqiptare, po rrënojnë buxhetet familjare, dhe ajo që po e ndjen në mënyrën më të fuqishme, për fat të keq, është dhe sektori, ndër më kryesorët e ekonomisë së vendit, turizmi.

Në këto rrethana emergjente, Partia Demokratike kërkon vendosjen e menjëhershme të subvencionimit të plotë të të gjitha biletave të transportit urban dhe inter-urban në territorin e Shqipërisë.

Ky propozim i Partisë Demokratike nuk është i pabazuar, përkundrazi është i bazuar në një praktikë, të cilën kanë vendosur një seri vendesh evropiane.

Ju rikujtoj këtu se sot, në Republikën Federale të Gjermanisë, me një biletë mujore prej 9 eurosh lëviz me të gjitha mjetet që qarkullojnë në këtë vend dhe në të gjithë territorin e saj. Vende të tjera si Spanja, Portugalia dhe një seri vendesh kanë shndërruar transportin publik falas.

Së dyti, Partia Demokratike kërkon përgjysmimin e menjëhershëm të taksës së naftës, e cila në Shqipëri, me vlerën 1.1 euro është më e larta në botë, dhe është shndërruar në një faktor kryesor të çmimit stratosferik të kësaj lënde djegëse.

Përgjysmimi i ngarkesës fiskale mbi litrin e naftës, domethënë ulja e saj nga 1.1 në 0.5 euro do të shoqërohej me një ulje korresponduese po kaq të rëndësishme të çmimit të naftës. Për ata që mendojnë se arka do boshatiset, ju them se nuk është e vërtetë! Mjafton që qeveria të zhdoganojë rreth 250 mijë ton naftë që kalojnë jashtë sistemit doganor në Shqipëri.

Këtu duhet të jemi shumë të qartë se nuk ka, nuk ka asnjë lloj mundësie për naftë kontrabande në këtë vend, përveçse kur patronohet nga dora e zezë e qeverisë. Ndaj dhe kërkoj edhe njëherë përgjysmimin me urgjencë të taksimit për litër nafte, i cili në Shqipëri është më i larti në botë.

Natyrisht unë jam i vetëdijshëm se Edi Rama, me arrogancën e tij dhe vesin e tmerrshëm të vjedhjes dhe pasurimit, duke vjedhur fonde dhe pasuritë publike, nuk merr dhe nuk do marrë parasysh këto kërkesa.

Por unë e garantoj se qytetarët shqiptarë në revoltën e tyre të ardhshme do të vendosin për këto kërkesa, dhe kërkesa të tjera të programit të emergjencës së Partisë Demokratike, siç është indeksimi i çmimeve dhe masa të tjera shumë të rëndësishme