PD përshëndet ngritjen e SPAK: Mekanizëm i duhur për të luftuar krimin e organizuar!
Partia Demokratike ka përshëndetur ngritjen e Prokurorisë së Posaçme Anti-Korrupsion, SPAK, si mekanizmi i duhur për të luftuar krimin e organizuar dhe korrupsionin dhe mbështet funksionimin e pavarur të kësaj strukture.
Shqipëria, tha Sekretari i përgjithshëm i Partisë Demokratike, Gazment Bardhi, ka një shans real për të luftuar krimin e organizuar dhe korrupsionin në nivelet më të larta, nga kriminelët me mbështetje qeveritare, tek politikanët dhe zyrtarët e lartë.
“Krijimi i Strukturës së Posaçme kundër Krimit të Organizuar dhe Korrupsionit, e njohur gjerësisht si SPAK, është mekanizmi i duhur kushtetues për të përmbushur një nga kërkesat kyçe të shqiptarëve dhe të partnerëve të huaj për t’i dhënë fund pandëshkueshmërisë së të fortëve, promovuesve të tyre në politikë dhe zyrtarëve të korruptuar” tha Gazment Bardhi duke shtuar se fillimi menjëherë nga puna dhe ndëshkimi i krimit të organizuar dhe korrupsionit duhet të bëhet në mënyrë profesionale, të paanshme dhe të vendosur.
“Megjithëse qeveria bëri gjithçka për ta vonuar ngritjen e SPAK-ut me 3 vjet, Partia Demokratike, e cila ka miratuar ligjin për ngritjen e tij dhe të Byrosë Kombëtare të hetimit, ka vullnetin për t’i dhënë besim dhe për të mos paragjykuar asnjë prej prokurorëve në përbërje të kësaj strukture.”
Ndryshe, sot me 11 vota për, KLP miratoi ngritjen e Prokurorisë së Posaçme, SPAK, me 8 anëtarët prokurorë të cilët me 19 Dhjetor do të betohen para Presidentit, kur ky vendim hyn në fuqi.
Prokurori i SPAK ka një mandat 9 vjeçar pa të drejtë riemërimi!
