PD s’ka nevojë për Tophane, por, për Elit’hane!

nga Agim Popoci

Propaganda e Edi Ramës nuk luftohet me Propagandë! Këtë duhet ta ketë parasysh lidershipi i Partisë Demokratike pa vazhduar të bie në kurthin e këtij njeriu me fuqinë e shtetit dhe krimit, që po i cakton dhe agjendën e veprimit opozitar duke shmangur skandalet aktuale që nuk kanë fund!

Që të ndodhë kjo, që një forcë e djathtë si PD të mos i jep terren propagandës kundër propagandës komuniste të Edi Ramës, duke i kursyer dhe energji gjithë atyre trimave të Facebookut që flasin për politikën e beftë të Sali Berishës dhe nevojën për një revolucion kundër Qeverisë Rama, lidershipi i Partisë Demokratike duhet të ketë në krah sa më shumë përfaqësues nga Elita Shqiptare, ndryshe mos të shoh ëndrra për ditën e gjykimit!

Është e patolerueshme që në ditët e zbulimit të një korrupsioni të përmasave të frikshme si ai i Tunelit të Llogarasë me Zv/Kryeministren Belinda Balluku, AKSHI, Durana, dhe së fundi kompanive të mashtrimit me call-center, PD të toleroj ushqimin e demokratëve me broçkulla që lançon impianti propagandistik i Edi Ramës, si ftesa për Kryeministrin më 21 Janar në SHBA për të dëshmuar si person në dijeni për çështjen “McGonigall” ku dhe do të arrestohet, fundi i Edi Ramës si ai i liderit venezuelian Maduro, anulimi i vizave amerikane për shqiptarët e deri tek shpenzimi i gjithë asaj energjie nëse është ftuar ose jo Edi Rama nga Presidenti Trump në Bordin e Paqes për Gazën, duke shmangur edhe gjithë atë krim që po ndodhte para hundëve të shqiptarëve: Dëmet nga Përmbytja!         

“Do ta arrijmë qëllimin tonë, kur të kemi fuqinë të qeshim ndërsa shkatërrojmë, çdo gjë që ishte e shenjtë për ne si traditë, si edukim dhe si dashuri njerëzore,” e ka thënë shefi i propagandës së Hitlerit në ditët e para të ngritjes së shtetit nazist, Joseph Goebbels, dhe nuk ka nevojë më ta lodhë kokën askush se nga buron gjithë ai krim në Planet e Edi Ramës; Por, që të mos arrihet ky qëllim, përveç protestave që po thirren kohë pas kohe dhe po përfundojnë duke u degraduar nga mediat kombëtare që kontrollohen nga Qeveria Rama, miratimin nga të gjithë asqerët e  Facebookut dhe pakënaqësitë që ngjizen në kafetë e lagjeve, lidershipi i Partisë Demokratike duhet ta ndryshoj faqen e saj të parë, me atë element që Edi Rama e urren: Intelektualin!     

“Nuk kishte kuptim të përpiqeshim të konvertonim intelektualët. Sepse intelektualët nuk do të konvertoheshin kurrë dhe gjithsesi do t’i nënshtroheshin gjithmonë më të fortit, dhe ky do të ishte gjithmonë ‘njeriu në rrugë’. Prandaj, argumentet duhet të jenë të papërpunuara, të qarta dhe bindëse, dhe t’u drejtohen emocioneve dhe instinkteve, jo intelektit. E vërteta ishte e parëndësishme dhe tërësisht e nënshtruar ndaj taktikave dhe psikologjisë,” jo vetëm që e ideoi dhe zbatoi Joseph Goebbels dhe e kopjoi frikshëm Edi Rama, por, kjo duhet ti shërbej lidershipit të PD-së se si ta trajtoj elitën shqiptare, pas gabimit të rëndë që nuk i gjeti vend të konsiderueshëm në pjesën e listës së fshehtë për deputetë, përballë horrave të Edi Ramës!

Ashtu siç ndërtoi Sulltan Mehmetit II, Tophanen e famshme për prodhimin e topave dhe gjyleve të topave, siç e rindërtoi Sulltan Sulejmani i Madhërishëm, dhe Pavijoni i Tophanes që u projektua nga William James Smith në vitin 1852 për t’i siguruar Sulltanit një bazë nga e cila do të inspektonte trupat e tij,  që sot shqiptarët dhe jo vetëm e njohin si sheshin me topa të vegjël para Qendrës së Kulturës dhe Artit Tophane, Kullës së vogël të sahatit në Stamboll, si pjesë e projektit Galataport, sot, lidershipi i Partisë Demokratike duhet ta ndërtoj një Elit’hane!

Jo, si ajo Tryeza e fundit “Lela Party”, por një organizëm elitar ku shqiptarët do ta shohin ekspertin i cili do të jetë nesër pjesë e qeverisë demokratike!

Në Elit’hanen e Partisë Demokratike shqiptarët duhet të shohin ekspertin e menaxhimit të ujërave dhe kullimit, i cili do të tregonte arsyet e përmbytjeve të fundit, si do të shmangeshin dhe çfarë cenoi jetën e shqiptarëve kur reshjet e ditëve të fundit ishin normale, dhe jo të përmasave siç mashtruan emergjencat e Edi Ramës!

Nga kjo Elit’hane edhe ekspertët e energjetikës do të shpjegonin jo vetëm shkarkimet me “bukuritë” e të cilave mburrej Edi Rama, por dhe humbjet nga ato shkarkime si pasojë e mosmenaxhimit të prurjeve për t’u shndërruar në prodhim të energjisë elektrike!

Sikur PD të kishte Elit’hane, shqiptarët nuk do të kishin nevojë as për Tophanen e Zvicrës së injorantit në kërkim nga SPAK-u i Edi Ramës, për të kuptuar vjedhjen në Tunelin e Llogarasë. Qeveria e PD si ndërtuese e tunelit në Rrugën e Kombit, model edhe sot në Ballkanin Perëndimor dhe me gjerë, do të mjaftohej vetëm me një ekspert për të sqaruar çdo abuzim të Ministrisë së drejtuar nga Belinda Balluku në Llogara, pavarësisht broçkullave të Gjykatës Kushtetuese të PS!

Rruga Qukës-Qafë Plloçë mund të jetë objekt hetimi i cilësdo qeveri, por, ajo që ndodhi me këtë projekt, ishte detyrim i Partisë Demokratike të sqarohet në detaje duke përfshirë dhe koston financiare!

AKSHI, jo vetëm për shkak të përmasave të vjedhjes por për shkak edhe të ekspertëve që Partia Demokratike kishte në ditët e saj të qeverisjes kur nisi me ndërtimin e Trurit Kombëtar, e ka për detyrë edhe sot të sqaroj nga Elit’hania e saj mënyrën dhe koston e abuzimit me AKSHI-n dhe projektin Durana!  

Lidershipi i Partisë Demokratike duhet ti jap fund edhe praktikës së informimit të shqiptarëve me shkeljen e Sigurisë Ushqimore nga vendkalimi Kosovë-Shqipëri, ku ndalohen gjithë ato ushqime që importohen në rrugë detare dhe eksportohen drejt Kosovës në rrugë tokësore! PD mund të ketë probleme me angazhimin e astronautëve ose pilotëve të avionëve luftarake të gjeneratës së fundit F-35, por, ekspertë ushqimorë ka në çdo qytet dhe jo vetëm në qytetin e njërit prej Universiteteve më të njohura në Evropë, siç është ai i Kamzës!  

Rast i ngjashëm është dhe Diplomacia, ku lidershipi i Partisë Demokratike vetëm me injorancën e saj lejoi që kurthin e Edi Ramës me Vendimin për vizat e Emigrimit të SHBA, ta fus në ingranazhin e saj ndonëse diplomatët më të njohur që ka Shqipëria kanë shërbyer gjatë qeverisjes demokratike.

Dhe, turpi me injorancën vazhdoi edhe me Bordin e Paqes për Gazën, ku propaganda e Edi Ramës ndryshoi anët strategjike të komunistëve dhe demokratëve me Amerikën, ku shqiptarët nuk dëgjuan asnjë reagim të përmbajtur derisa ky Bord u bë pis me kriminel si Putin e Lukashenko!  

Reforma në Drejtësi e Edi Ramës i ka bë një nder të madh Partisë Demokratike ndonëse padrejtësi të madhe të gjithë atyre individëve që kishin njohje qoftë edhe me një demokrat, sepse me largimin e tyre nga Vettingu tani kanë në basenin e tyre juridik, si Prokurorë ashtu dhe Gjykatës shumë kompetentë!

Me këtë Elit’hane edhe denoncimi përveç se më cilësor do të ndryshonte pamje me të palodhshmin Sali Berisha, ku çdo ditë shqiptarët shohin një përpjekje titanike të vetëm një njeriu për të dëshmuar vjedhjet e paskrupullta të pushtetit të Edi Ramës, por, që nga propaganda komuniste thjeshtë bëhen nul me cilësim politik të luftës për pushtet!    

Me fitimin e besimit, Elit’hania do ti vinte një filtër edhe pjesës së shëndoshë të atyre që aktualisht janë më të akuzuarit në shoqërinë shqiptare, Ndërtuesve!

Ndërtimi dhe Pastrimi i Parave ishte një binom që ka shoqëruar Edi Ramën që nga ditët e para të uljes së tij në fronin e Kryetarit të Bashkisë Tiranë! Përveç dyshimeve dhe akuzave pa fund që vijnë nga Banka Botërore dhe Fondi Monetar Ndërkombëtar, i takon Elit’hanes së Partisë Demokratike që të sqaroj këtë kancer të ekonomisë shqiptare i cili në një ditë të bukur mund ti shkaktoj edhe kolaps, që nuk është parë në historinë e ekonomisë botërore!  

Në fund, me një Elit’hane me ekspertë të luftës kundër trafikut të drogës, qenieve njerëzore dhe pastrimit të parave, Partia Demokratike njëherë e mirë do të distancohej nga ata që e mbajnë në pushtet Edi Ramën dhe Kryeministri i tallë si orligarkë, Samir Mane, Shefqet Kastrati, Pëllumb Salillari, Bashkim Ulaj, Klodian Allajbeu dhe së fundi edhe Blerim Devolli!

Ndryshe, duke vazhduar me opozitë pa Elit’hane, shqiptarët do të vazhdojnë të protestojnë duke mbajtur sytë nga qielli në pritje të helikopterit që do të arrestoj Edi Ramën, shoqëruar me përplasjet e forta në Facebook me patronazhistët, epilogun e të cilës situatë George Orwell e ka përcaktuar shumë kohë më parë:

E gjithë propaganda e luftës, të gjitha britmat, gënjeshtrat dhe urrejtja vijnë gjithmonë nga njerëz që nuk luftojnë!