PD u faktua si lokomotivë e zhvillimit, Berisha: Sot, vijmë më të sigurtë se kurrë, në fitoren e 11 majit!
Partia Demokratike u faktua si lokomotivë e padiskutueshme e zhvillimit, tha Kryetari i Partisë Demokratike, Sali Berisha, në 34 vjetorin e themelimit të PD Dega Pogradec, duke garantuar se sot, vijnë më të fuqishëm, më të bashkuar, më të sigurtë se kurrë në fitoren e 11 majit
“Partia Demokratike ishte forca e parë politike, ndoshta jo vetëm në Shqipëri, por edhe më gjerë, që themelohej nga qytetarët shqiptarë. Në rast se, partia tjetër që qeverisi 45 vite Shqipërinë u themelua në Tiranë nga Beogradi, kjo është e vërteta, por përsëri, duart e tjerëve nuk kishin munguar edhe para saj.
Në 34 vite, Partia Demokratike u faktua si lokomotivë e padiskutueshme e zhvillimit, e nxjerrjes së Shqipërisë nga izolimi, i integrimit të saj në institucionet euroatlantike,” tha Sali berisha duke fol për arritje epokale të Partisë Demokratike, përveç përmbysjes së diktaturës, me votën e lirë.
“Arriti që shqiptarët në kohëra, qytetarët më të keqpaguar të shndërrohen në qytetarët më të mirëpaguar, me rrogat dhe pensionet e tyre.
Arriti të transformojë në tërësi infrastrukturën e vendit. Padiskutim që, ajo pati gabimet e veta, pati mossukseset e veta, por një gjë nuk duhet të harroni kurrë; trashëgimia e saj janë arritjet që përmenda, janë gabime, por nuk janë kurrë krime.
Ata që shprehen se jemi njëlloj, ata mashtrojnë veten e tyre, ose përsërisin një mashtrim të shërbëtorëve të narkodiktaturës. Por, përsëri rikthehemi te ky 34-vjetor,” tha Kryetari i PD ndërsa foli për tre 3 vitet e një kalvari të cilin nuk e ka përjetuar asnjë forcë politike në një vend demokratik, në një vend të lirë.
“U bë një përpjekje antidemokratike e turpshme, që të na shndërronin në një parti simotër të Rilindjes së Edi Ramës.
U bë një përpjekje që të gjitha pushtetet në këtë vend t’i jepeshin një njeriu, si përfaqësuesi më të rrezikshëm të mafies ndërkombëtare, mafies së George Sorosit.
Në këtë betejë të egër kundër nesh, arritën të na përçanin, arritën të na burgosnin, arritën me makinerinë e tyre të shpifjeve të ngrinin një mal të tërë mashtrimesh, trillimesh.
Por si njerëz të cilët besonim në parimet dhe vlerat që mbrojmë, ne nuk u dorëzuam. Ne nuk u dorëzuam me besimin se, ato nuk janë të vërteta që nuk mund të mposhten kurrë. Se dinjiteti njerëzor, se interesi kombëtar, se liria dhe vlerat e saj, se familja dhe shenjtëria e saj, janë shtyllat e një shoqërie të lirë, e njerëzve me dinjitet.
Ndaj dhe ne, qendruam dhe vijmë sot, ju garantoj unë ju, më të fuqishëm, më të bashkuar, më të sigurtë se kurrë në fitoren e 11 majit,” tha Kryetari i Partisë Demoratike duke siguruar demokratët e Pogradecit dhe gjithë Shqipërisë:
“Ne do vendosim familjen shqiptare në meritat që ajo meriton. Është ajo që ka garantuar ekzistencën e kombit shqiptar.
Ne, do garantojmë lirinë dhe dinjitetin e qytetarëve shqiptarë. Ne do mbrojmë në çdo kohë dhe në çdo rast, interesin kombëtar të shqiptarëve.
Ne, jemi patriotë, e duam fort Pogradecin, e duam fort Shqipërinë. Dhe për ne, Pogradeci dhe Shqipëria do të jetë gjithnjë e para. Nuk mund të ketë asnjë mëdyshje, asnjë hezitim.”
