PDIU në Vlorë, Idrizi: T’i drejtohemi Commonwealthit ekonomik të shqiptarëve
Nëse doni të mos flasim për patriotizëm folklorik, hajde t’i kthejmë sytë nga ekonomia, këto që i ka shtyrë gjithmonë përpara PDIU, tha Kryetari i Partisë Drejtësi Integrim dhe Unitet, Shpëtim Idrizi, ku së bashku me kandidatët për këshilltarë prezantuan pikat e programit politik që përbashkon në zgjedhjet lokale të 14 majit, vizionin për Qarkun e Vlorës, po aq sa edhe për idealin patriotik.
“Çështja e shqiptarëve të Çamërisë është një çështje kombëtare, ashtu siç është çështja e Kosovës, çështja e të drejtave të shqiptarëve kudo ku janë. Janë një çështje e të gjithë shqiptarëve. Se sot ne po flasim për atë që po ndodh në Kosovë por ne në radhë të parë duhet ta shohim çështjen e shqiptarëve nga ekonomia. Prandaj kemi bërë thirrje që ne t’i drejtohemi Commonwealthit ekonomik të shqiptarëve.
Ne nuk kemi frikë që të lexojmë kushtetutën e Shqipërisë ku shkruhet e zeza mbi të bardhë për identitet dhe bashkim kombëtar. Hajde ta bashkojmë nga ekonomia. Të bëjmë një studim se kush janë avantazhet e ekonomisë shqiptare, kush janë avantazhet e ekonomisë së Kosovës dhe t’i bëjmë ato komplementarë,” tha Shpëtim Idrizi në Vlorë duke shtuar që nëse doni të mos flasim për patriotizëm folklorik, hajde t’i kthejmë sytë nga ekonomia, këto dhe i ka shtyrë gjithmonë përpara PDIU.
“Sot shohim që ka një konflikt mes Shqipërisë dhe Serbisë, ju duhet të dini se partneri më i madh tregtar dhe importuesi më i madh i mallrave në Kosovë, është Serbia. Pra, ka një nonsens shumë të madh. Sot, ne flasim për njohje apo mosnjohje, Kosova importon rreth 600 milionë euro produkte me Serbinë dhe vetëm 300 milionë me Shqipërinë.
Kur ne flasim për problemet që ka Kosova apo shqiptarët e Maqedonisë së Veriut, apo shqiptarët kudo ku janë, ne jemi si ajo pjesa e trupit që dhemb kudo njëlloj. Jam dakord që ne duhet të kemi një paqe të madhe, sociale, historike, në të gjithë Ballkanin. Edhe me Open Balkan.
Po ne s’mund të kemi Open Balkan nga sipër dhe ta lemë këtu nga poshtë me Greqinë. Jam dakord që të kemi një dakordësi të madhe si vende ku nuk kemi ku ta çojmë njëri-tjetrin, por të respektojmë të drejtat e minoritetit, të drejtat e shqiptarëve të Çamërisë, liritë dhe të drejtat e njeriut. Ta bëjmë pikërisht Ballkanin nga një fuqi baruti në një zonë të lirë ekonomike. Por kjo vlen për të tërë dhe jo vetëm për një pjesë,” tha kreu i PDIU, Shpëtim Idrizi, duke vlerësuar Qarkun e Vlorës si një bastion jo vetëm të shqiptarëve të Çamërisë, por edhe si qytetin e flamurit, e patriotëve dhe qarkun që është bekuar me natyrën e potencialin e madh të zhvillimit, aty ku ka rëndësi që parlamenti i bashkisë të punojë për t’i dhënë alternativë të rinjve të mos largohen nga vendi.
