PDK: Mos e dëmtoni partneritetin me SHBA
Partia Demokratike e Kosovës, PDK, ka shprehur shqetësimin e saj për mungesën e theksuar të bashkërendimit dhe bashkëveprimit institucional për çështjet e interesit shtetëror të Kosovës, raporton RFE.
PDK përmes një deklarate konsideron që një gjë e tillë është duke e dëmtuar partneritetin me Shtetet e Bashkuara dhe pozicionin e Kosovës në rrafshin ndërkombëtar.
Sipas saj, duhet të hiqet dorë nga qasja dhe protagonizmi i njëanshëm politik, i cili po e shpie Kosovën në krizë politike, në kohën kur siç është shprehur PDK, sfidat me të cilat përballet Kosova kërkojnë unitet kombëtar.
Parlamenti i Republikës së Kosovës, thekson deklarata është institucioni më i lartë i shtetit dhe asnjë vendim nuk ka vlerë pa marrë miratimin e deputetëve të tij.
Prandaj kjo parti kërkon që të hiqet dorë nga deklarimet për korrigjimin e kufijve si dhe nga deklarimet e thirrjes së një Konference Ndërkombëtare për Kosovën.
“Kosova shkon në dialog (me Serbinë) vetëm për normalizimin e plotë të marrëdhënieve me Serbinë, njohjen reciproke, ulësen në OKB dhe përshpejtimin e anëtarësimit në BE dhe NATO,” thekson PDK
Çdo vendimmarrje e arritur në përfundim të dialogut me Serbinë, sipas
Partisë Demokratike të Kosovës, duhet të legjitimohet nga vullneti i drejtpërdrejtë i popullit të Kosovës me referendum dhe nga Parlamenti i Republikës së Kosovës
