Pedagogët vendosin: Qeveria afat deri më 1 shkurt, nëse nuk plotësohen kërkesat…

Në mbledhjen e Senateve Akademike, pedagogët e Universitetit të Tiranës vendosën që t’i japin një javë afat qeverisë që të anulojë ligjin për Arsimin e Lartë.

Në rast se qeveria nuk do t’i pranojë kërkesat e tyre, pedagogët votuan unanimisht se do të vazhdojnë bojkot pa afat të mësimit si dhe grevë të përgjithshme.

Pedagogët kërkuan:

Mbështetje të protestës së studentëve

Shprehjen parimisht për ndryshim të ligjit për arsimin e lartë

Anulimin e menjëhershëm të VKM

Ndalimi e denigrimit të figurës së pedagogëve

Miratim i statusit të pedagogut

Rritjen e financimit publik për arsimin me 0,5% brenda këtij viti dhe me rritje graduale.

Gjatë mbledhjes së Senateve Akademike, pedagogu dhe drejtuesi i Departamentit të Gazetarisë në Universitetin e Histori-Filologjisë, Mark Marku tha se qeveria ka ndërhyrë në autonominë akademike.

“Ne me VKM-të jemi shndërruar në një universitet pa kurrfarë autonomie. A do ta pranojmë ne këtë? A jemi ne një trupë e vdekur siç shpreson qeveria? Është koha dhe kemi të gjitha mundësitë për të reaguar,” tha Mark Marku.

Në mbledhjen e zhvilluar të Senateve Akademike, pedagogët e Universitetit të Tiranës diskutuan lidhur me protestën e studentëve, si dhe mbështetjen që pedagogët e UT, po u japin studentëve.