Pejë-Rozhaje vetëm për 18 minuta

Punimet në hapjen e tunelit në mes të Rozhajes dhe Pejës përkatësisht lidhjes me autostradat Prishtinë-Pejë dhe Bar-Bolare-Beograd do të fillojnë shumë shpejtë.

Kjo është marrëveshja e arritur në takimin e përfaqësuesve të Ministrisë së Transportit të Malit të Zi dhe Ministrisë së Planifikimit Hapsinor të Kosovës, Mersad Ibrahimoviç dhe Rexhep Kadriu, bënë të ditur televizioni publik malazez RTCG.

Bisedimet rreth realizimit të këtij projekti kanë filluar kohë më parë nga kryeministrat, Dushko Markoviç dhe Ramush Haradinaj, dhe kanë vazhduar nga ministrat përkatës.

“Projekti ka edhe interes ndërkombëtar sepse kryeministri i Kosovës e ka prezantuar në Sofje,” tha Ibrahimoviç ndërsa Kadriu duke kujtuar marrëveshjen e dy kryeministrave shtoi:

“Mendoj se ky është një moment historik në marrëdhëniet në mes të dy shteteve sepse tuneli përveç lidhjes së mirë të trafikut do të ndikoj edhe në vendosjen e bashkëpunimit cilësor në të gjitha fushat,” theksoi Kadriu.

Njeriu i parë i Rozhajes, Ejup Nurkoviç tha se komuna e mbështetë realizimin e këtij projekti dhe është e gatshme që të ndihmoj në realizimin e tij.

Në takim është prezantuar projekti sipas të cilit ndërtimi i tunelit do të kushtoj 106 milionë euro ndërsa e gjithë pjesa e rrugës që do të lidhë dy autostradat 181 milionë euro. Mjetet do të sigurohen nga Fondet e Bashkimit Evropian dhe buxhetet e Malit të Zi dhe Kosovës.

Tuneli do të jetë i gjatë 7.25 kilometra, ndërsa gjatësia e rrugës Rozhajë-Pejë do të shkurtohet nga 47 kilometra sa është aktualisht, në 23.5 kilometra. Me rrugën e re, udhëtimi nga nga Peja në Rozhajë do të zgjas vetëm 18 minuta.